Esta koensidensya me enkanto. Porke poko antes de meldar este mesaje, estava aparejando fotos i dokumentos para el proyekto “Centropa”. Yo so una de las informantes, i lavorando aktualmente, kon una de las mansevas de la ekipa, djustamente ensima los rekuerdos sovre mis djenitores. I, en esto, vino el “Şalom”. Otruna vez, en la primera oja, el nombre del “Bet Avot”, sitandose a la okazyon de una aktividad alegre. Pensi ke tantos azardos deviyan tener una sinyifikasyon para mi..
En el 26 de Junio 2007 se esta organizando un “Festival de Kuentos en Ladino” kon el eslogano “Vini Kontaremos.” El Festival, selebrando el “Jubileo”del 50. anyo del Bet Avot, se esta realizando debasho el “Patronaje” del Sr. Yitzhak Navon, sinken prezidente del Estado de Israel. El envitado d’onor Es el Gran Rabino de Turkiya, Rav İtzhak Haleva. No es solamente un Festival de Kuentos, ma, una grande fyesta, kon kantes, filmos i diversas aktividades.
Lektores dezeozos de informarsen sovre la istorya del “Bet Avot”, pueden referarsen a los Nos. 13 i 25 de “El Amaneser.” Esto dando esta referensya bazandome sovre el fakto ke guadrarash las revistas, ke konsidero syendo una arshiva Kultural i İstorika. Aun kon todo aki, chikas notisyas de este lugar ke konosi personelmente, i lo vijiti munchas vezes. La institusyon situada en Kiryat Matalon, serka de Petah- Tikva, es konstruida en una chika altura, “tepe.”Ayi se da todo modo de servisyos sosyal i medikal. Aparejada asigun las reglas de “Kasherut”, la alimentasyon es kontrolada por el Ministeryo de la Salud.
Los moradores del “Bet Avot”, en mayoriya, son orijinaryos de los paises Balkanikos i Turkiya. Sin egzajerar puedo dezir, mizmo si ay diferensyas de dialekto i de aksantuasyon, kaji todos avlan el Judeo- Espanyol. Esto me aviya enkantado, i mizmo maraviyado kuando oyi avlarse ayi, la idioma muestra... Al mizmo nivel ke la lingua, las tradisyones i rituales son konservadas, tambyen la Kultura. En la Asamblea Jeneral del “Bet Avot” ay nombres konosidos komo, Matilda Koen- Sarano, Moshe Shaul, Zelda Ovadia, Selim Salti ets..Asigun los shifros, el 39% de los moradores son de Turkiya, 38% de Gresya, 8% de Bulgariya. Komo se esta vyendo tyenen en komun la lingua J- Espanyola.
El Papa miyo un idealisto, fue uno de los primeros a vijitar el muevo Estado de Israel. Komo se uzava a dezir: “Fue echar un ojiko!..” Torno, ma, no avlo nada, asta el otonyo 1955 (6- 7 Septembre). Lo embiyo de vista a mi ermaniko Moris, para kompletar sus estudyos, i se fue otruna vez i el a ver... En el Marso 1956, mis paryentes, djuntos mi ermaniko chiko, Davit, izyeron “Aliyah.” En su primer viyaje, mi Papa ya aviya dechidado afilu ande ivan a bivir: “Petah- Tikva”, lugar ande biviyan munchos Çorlulus...
Oy es 17 Junio, el “Diya de los Padres”, i es puro azardo si esto eskrivyendo sovre mi Padre. En todo kavzo no es un artikolo dedikado a este diya, ke ya va pasar, asta ke va publikarse. Fiandome a vuestra induljensya, keridos lektores, avli de mi Papa. Es puede ser mi manera de nombrarlo en este diya espesyal.
P- S- En este mizmo banko de la foto, pasimos oras kon mi Papa azyendo “moabet.”- C.D.
