Onorimos el Grande Profesor Yomtov Garti en la Sinagoga Hemdat Israel de Kadikoy

El primer interlokutor, el Gabay de la Sinagoga Sedat Amon, mos anonso ke, dagora endelantre se va organizar ‘Diyas Espesiales’ por onorar los grandes administratores de esta komunidad.
El segundo interlokutor, Rabbi Leon Adoni, se adreso al profesor kon muy grande emosyon:’Munchos grandes personajes pasaron de esta grande Sinagoga. Oy estomos aki por onorar un otro grande personaje, Yomtov Garti, ke lavoro munchos anyos kon muy grande ardor por este Templo. Kon su saverisio, kon su kapasidad i kon su alma, el izo munchos grandes servisios por esta komunidad. Yomtov Garti siempre fue atado a la Torah i siempre pratiko las reglas de la Torah. Siendo un lider muy modesto i muy djusto, este grande personaje va ser un buen ekzemplio a las futures jenerasiones. Allado de sus kalidades komo administrator i lider, Yomtov Garti fue uno de los mas grandes edukatores de este pais. El lavoro en munchas eskolas i munchos de sus elevos no se pueden olvidar de el i de sus lisyiones de matematika i de fisika. Kreygo ke no va abastar biervos para deskribir las kalidades de Yomtov Garti. Agora me va ir allado de el i le va bezar la mano al nombre de todos sus elevos’.
El segundo interlokutor Moshe Palachi, mos avlo de la personalidad egzamplario de Yomtov Garti. Moshe Palachi mos konto, komo kon tanta ardor, Yomtov Garti ayudo i ankurajo sus elevos para ke adelanten en la vida. El fue tanto modesto ke, en las eleksiones del Konsilio de Administrasion, el, meldava su nombre al kavo de todos, mezmo ke era el, el ke tomava los mas munchos votos. Munchos anyos, Garti fue elejido komo Prezidente del Konsolio, i ayudo a todos los miembros de esta komunidad, aziendose ‘ kon el chiko chiko, i kon el grande grande’.
El Przidente del Konsilio de Administrasion de Kadikoy, Mordo Kumrulukush, mos adreso la palavra, en dizyendo ke esta Sinagoga de sien i ocho anyos, los detenyo a los djudios todo endjuntos, prokurando de bivir todos en paz. ‘Oy un otro grande evenemiento se esta selebrando en esta Sinagoga. Estomos remersiando muestro grande administrator i muestro grande profesor por sus servisios por esta komunidad’.
Mordo Kumrulukush prezento al profesor la plaketa ke fue aparejada por el Konsilio de Administrasion de Kadikoy. En tomando la plaketa, Yomtov Garti mos adreso la palavra, en dizyendo ke el fue muy emosionado oyendo estos ermozos biervos de la boka de sus amigos. Kon su modestiya, Yomtov Garti mos disho ke el no saviya ke izo tantas ermozas kozas por esta Sinagoga i por esta komunidad. ‘El premio de una buenda, de una favor deve de ser solo la favor propio’ disho Garti. ‘Kada vez ke vengo a este ermozo Templo me emosyono i me siento muy alegre. Muestra chikes, muestra manseves paso aki. Mozotros, los Kadikoylus, mos sintimos muy kontente i muy alegre kuando mos topamos endjuntos en esta Sinagoga. Agora vos va meldar la poeziya ke eskrivi por la Sinagoga Hemdat Israel’.
Duspues de la seremonia, los asistientes fueron envitados al salon, ande se aparejo la seuda del dia de Shabat. En este salon, selebrimos todos endjuntos este evenemiento en enkolgando una tabela kon el nombre de Yomtov Garti en las paredes de la Sinagoga Hemdat Israel. Yomtov Garti fue la primera persona, el nombre de kel, fue eskrita en las paredes de la Sinagoga, en estando el en vida.
Oguramos ke el Dio le de vida i ke kontinue a edukar mas munchos elevos i a lavorar mas munchos anyos por muestra komunidad.