“Lokalita eksepsyonel, maraviya natural, el D. bindicho le dio todo: el sol, la luvia,las kolinas vedres, el ayre fresko del norte en enverano, i el ayre kayente del sud en invyerno.” Aki kero tomar un reflo keridos lektores... Verdad ke Estambol tyene todo, no se enyega. Ma la luvya?! ay tyempos ke no la vemos, ke no “uğradeya!” por muestra sivdad... Kontinuaremos del teksto orijinal, kon un rekuerdo nostaljiko:
“Komo no enkantarse de su ermozura, kuando la observamos en primavera, de madrugada, de una de sus kolinas de Galata. El sielo azul reflekta su kolor a las aguas ke entornan la sivdad... A los fanatikos de Estambol no les gusta de viajar en enverano, por la semple razon ke les gusta gozar i savorear el klima dulse de eya.”
Esto vyendo ke estamos de mizma idea, de la povlasyon tan grande de Estambol. Aki me desplaze de kontradezir, ma oy se puede afirmar ke el klima de muestra sivdad, no esta tan dulse... En estos diyas la temperatura no esta azyendo bushkar la de Antalya!... Malgrado todo, un torno oras de tadre al Bosfor, aze olvidar esta kalor.
“Keridos amigos, no estare a dizirvos el nombre de livros i publikasyones ke fueron eskritos sovre esta sivdad. Mozotros, los nasidos en Estambol puedemos avlar a su sujeto sienes de oras sin artarmos, i por esto yo keria agora konsentrarme sovre la vida djudia de Estambol, su istoria i su futuro.”
El teksto esta kontinuando kon detalyos sovre la istorya de la sivdad, de la vida djudia. Konsiderando mi lugar limitado, no penso tokar a esta parte del teksto del Sr. Salti ke esta demandando:? “Kual sera el futurode los djudios d’Estambol? Reelmente no se komo responder. En sus repuestas a esta pregunta, Selim Salti me dyo la impresyon de sentirse un poko pesimisto. A la fin, i el afilu esta dizyendo: “...En este momento kero deshar kon deskudio todo esto i sonyar... a los diyas orozos de mi chikes... Serro los ojos i me meto a sintirte Estambol. Penso a ti, te siento ke me dizes: ”Komo mi no ay sigunda.”
Devo prechizar ke konosi el Sr. Salti personelmente, el anyo pasado, en una reunyon ande Klara Perahya. Tuvimos una konversasyon enteresante. Lo rengrasyo por la oportunidad de inspirasyon ke me dyo su teksto, preparando mi artikolo de la semana. Otruna vez sintiremos todos Estambol en mi poeziya del anyo 2004.
ESTAMBOL
Los ojos serrados, yo,
Kero sintir Estambol.
Ma, no lo esto pudyendo...
El korason yorando, yo,
A Estambol esto bushkando...
Ma, no lo esto vyendo...
Todo beton, todo pyedras,
A Estambol no topo mas.
Enamorada de esta sivdad,
A eya atada kon fidelidad,
Esto pensando, la pyedri!...
A esto me vo kemando,
İ djuntos eya kon mi,
Veygo k’esta yorando...
No yores, no te desho,
De ti nunka me alesho...
