Las festividades empesaron el 25 del mez de Junyo kon un panel denominado “İzmirin Dünü ve Yarını”, sovre la Istorya de esta ermoza komunidad ansi ke la importansa de la grande sinagoga fraguada en los anyos 1905- 1907 sovre baza de un ferman del Sultan Abdülhamit II .
Partisiparon aktivamente a este panel : Jak Kaya en su kualidad de moderador i komo oradores: la Sosyologa Doç. Dr.Okçay ke avlo sovre el pasado istoriko de la kolektividad Judia, Selim Amado orijinaryo de Izmir, eks- prezidente de la Asosyasyon Israelyana “Türkiyeliler Birliği”,el kual ekspreso su nostaljia i konto sus rekuerdos, ansi ke Naim Güleryüz viche Prezidente del “500 Yıl Vakı”ke traso un plano para prezervar en el futuro la rika erensya kultural Judia de esta sivdad.
El 27/6. Selebrasyon relijyoza debasho la direksyon del Kapo Rabino Rav Nesim Barmaymon i de Jak Kaya.
Adornada por la sirkunstansya i en una atmosfera de karinyo i kontentes, la grande Sinagoga estava yena de yahidim ansi ke de nombrozas personalidades venidas de otros payizes i sivdades.
En la asistensya el Gran Rabino de Turkiya Rav Isak Haleva i su konsorte Rejin Haleva eya mizma nasida en Izmir, el Konsul Jeneral de Israel Mordehai Amihai, el Prezidente de la Komunidad Silvyo i Lika Ovadya, el vise prezidente Sami i Süzet Herman, Momo Uzsinay prezidente de la asosyasyon “Türkiyelilerin Birliği” de Israel, Selim Amado, i el selebre Yoram Gaon byen konosido por su boz de oro i su profundo atamyento a sus raizes sefardies, ansi ke nombrozos notavles.
Uvo munchos diskorsos, Rav Isak Haleva tambyen tomo la palavra i avlo del rolo no solo relijyozo ma igualmente sosyal de la Sinagoga ande los yahıdım orasyonan i en mizmo tyempo fraternizan.
Mos ekskuzamos de no pueder, por mankura de lugar, kontar la seremonia en su totalidad ni sitar los nombres de todos los ke partisiparon.
Lo todo fue koronado por el konserto de kantikas i romansas Judeo- Espanyoles de Yoram Gaon ke kedara syempre uno de los simboles del karinyo sefardi.
Tres ermozas Bodas en la Sinagoga Neve Şalom
Adornado komo syempre de flores , rizas, kantes i vestimyentas de diferentes kolores, el Kaal Neve Şalom estuvo alhad pasado en estado de fyesta i ansi sea de agora adelantre.
Tres bodas, tres muevas kazas Judias, tres famiyas en formasyon.
Aunaron sus vidas en la alegria i el amor:
Nüket ija de Belinda Pardo & Yomtov Tovi Franko kon Melih ijo de Lüsi i Izak Filiba
Solita ija de Bienvenida i Niso Kalaora kon Emre ijo de Meral Benadrete i Albert Marçelli
Sara ija de Deniz i Jojo Illel prezidente de la Ovra Orahayim kon Yusuf ijo de Donna i Selim Alkalay.
Ke estas tres unyones seyan bendichas por los Syelos , amados del Dyo amados de la djente.
Todas muestras felisitasyones a las famiyas “Pardo,Franko i Filiba” , “Kalaora, Benadrete i Marçelli”, “İllel i Alkalay”.
