La Komunidad de Izmir fyesto el sentenaryo de la Sinagoga Beth IsraelEs kon una profunda emosyon i muncha allegria ke la Komunidad de Izmir enkavesada de su Prezidente Jak Kaya i su Kapo Rabino Rav Nesim Barmaymon selebro el sentenaryo de la grande Sinagoga Beth Israel.
Klara PERAHYA
Las novedades son numerozas desde la semana pasada:
Blair dezinyado emiseryo espesyal kargado de sigir la situasyon en el Oriente- Medyo, kon el objetivo espesyal de ayudar al establesimyento de un Governo Palestinyano enkavesado por Mahmoud Abbas . Aprobasyon kaji total del Oksidente i de syertos payizes Arabos ansi ke de Israel pronto a dar su apoyo a un Estado Palestinyano en Sisjordania..
De otra parte refuzo kategoriko de la parte del Hamas de achetar la prezensya de Tony Blair komo emisaryo del kuartet i syempre deklarasyones de non rekonesensya de la lejitimidad de Israel
El puevlo Palestinyano aktualmente espartido en dos...antagonizmo fraktisido muy dolorozo por seguro.... En Gaza mizmo, de una vanda gerreadores pushados por un ideal echo de odyo i fanatizmo i de la otra una populasyon medya ambyerta , manka de todo salvo del dezeo obsesyonal de eksterminar su vezino.
Menester urjente de produktos vitales de baza en esta parte de la tyerra... Israel avyo dos puertas para el pasaje de komanya i produktos farmasetikos,lo ke no kontento syertos payizes oksidentales ke reklaman una tresera o kuatrena avyertura.
Avrir un treser pasaje es puede ser una nesesidad umanitarya ma tambyen un muevo risko para los sivdadinos Israelyanos... Mas ay lugares de pasaje mas puja la posibilidad de infiltrasyon del enemigo, un enemigo inkondisyonal ke tyene komo solo eskopo la eliminasyon de Israel.
De muevo Israel konfrontado a uno de estos problemas sin solusyon. Kavzo de konsensya byen entendido, es un prinsipyo en el djudaizmo de no deshar murir ninguno, sea mizmo el jo de su enemigo ...
Desde syempre, el djudyo fue peleador, luchador ma nunka eksterminador.
Ay mas de 2000 anyos ke el se topa ansi facha kon facha kon una situasyon ambivalente ande “eskojer una solusyon” es meter en perikolo el resto del problema..
Por las oras, segun lo ke eskrive el kotidyano “Le Monde” bazandose sovre un komunikado de la ajensia Reuter, publikado Alhad la noche 1 Julyo, Israel (en el buto de apoyar el Prezidente Mahomud Abbas) ya empeso a transferir a las Otoridades Palestinyanas de Sisjordania una partida del montante de los impuestos i derechos de duana ke fueron blokados ay de esto 17 mezes, despues la viktorya del Hamas en las eleksyones lejislativas.
Muevos montantes seran versados las semanas vinyentes ke serviran a menesteres pasifikos i sovre todo a pagar las mezadas de los fonksyonaryos palestinyanos.
Les movimyentos radikales Islamistos de Gaza no mankaron de konsiderar este deblokaje de fondos komo korrupsyon finansyera i shantaje diplomatiko de la parte de Israel
El “portavos” de Ehud Olmert deklaro ke Israel esta pronto a lavorar kon el muevo Governo Palestinyano i a ayudar Mahmoud Abbas a krear una administrasyon fuerte, kapache de engajar negosyasyones..
El Primer Ministro Israelyano deklaro tambyen ke "la interdiksyon en Sisjordania de kualkyer posesyon illegal de armas o produktos eksplozivos" i "las mezuras tomadas de la parte del Fatah en vista de kontrolar los grupos armados del Hamas" puedran asegurar grandes progresos sovre el fronto diplomatiko i krear munchas posivilidades de una kooperasyon..
Malorozamente lunes demanyana un mansevo del Fatah mizmo, myembro de la Brigada de los “Martiryos de al Aqsa” topo la muerte a la sigida de una konfrontasyon kon las fuersas Israelyanas.
Es ke se puede syempre tener una chika esperansa? No mos olvidaremos ke ande ay kooperasyon ay tambyen posibilidad de esperansa.
