Ma los Fransezes nunka akseptaron ke los djuios fueron los primeros en el kampo de la imprimeria. Komo los primeros livros publikados eran en ebreo, los istoriadores fransezes no lo akseptaron komo una kontribusion a la kultura franseza i universal.
En Italia, los primeros livros imprimados en ebreo fueron publikados en Reggia de Colabria. Ma asta el anyo 1475, ya aviya mas de 150 livros imprimados en Fransia.
En Espanya tambien, los primeros a imprimir livros fueron dos djudios: Alfonso Fernandos Cordoba i Lamberto Palmart. Sus imprimerias publikavan livros en ebreo, livros teknikos livros sovre la Eglisia Katolikia. Ma estos dos imprimidores fueron asasinados antes la Ingizision porke avian publikados mas munchos livros en ebreo ke en la lingua espanyola.
En Portugal, el respektado eskridor djudio Valentin Fernandes de Maravia fue el primer a fondar una imprimeria. Valentin Fernandes fue el fondador de la primera imprimeria rabinika i tambien la primera imprimeria portugeza ke publiko un livro sovre la vida de Kristo.
Tres djudios, Elazar Toledano, Jose Halfon i Juda Gueddia fondaron otras imprimerias en Portugal iIimprimaron livros en latino i en ebreo. Dudpues de la ekspulsion de los djudios de Portugal, estas imprimerias fueron serradas. Komo los fransezes, los portugezes tambien refuzaron de akseptar a los djudios komo los primeros imprimidores.
En el norte de Italia, en el anyo 1483, Israel Natan Sonsino instalo sus imprimerias .Su ijo Josue Salamon Sonsino I su inyeto Gershon Ben Moshe Sonsino kontinuaron la mezma profesion. Gershon Ben Moshe Sonsino fue el primer imprimedor ke empleyo la letras “italikas” en la imprimeria. En el anyo 1526, la firma de Sonsino kontinuo su aktividad en Salonika I en Estanbol.. La famiya Sonsino gano grande sukseso en el kampo de la imprimeria..
En el anyo 1925, la alkunya Sonsino fue adoptada por la sosiedad de imprimedores djudios en Berlin “Soncino Gesselschaft” ke publiko munchas ovras djudias. En el anyo 1929, en Ingiltierra tambien, la alkunya Sonsino fue adoptada por una sosiedad de imprimedores djudios ke izyeron la traduksion del Talmud al inglez.
En el anyo 1627, Menase Ben Israel fondo la primera imprimeria en Amsterdam, la sivdad ke fue el mas importante sentro de la imprimeria en Evropa. La firma de Solomo Ben Jose Props fue una de las firmas las mas konosidas en este kampo.
Komo estomos viendo, la imprimeria djudia fue distingada por su grande aktividad i por el numero de livros publikados kuando dayinda el mundo estavan echando sus primeros pasos en este kampo.
