Profundamente atado a los preseptos de moralidad i umanizmo ke de syempre fueron las grandes karakteristikas de muestra komunidad, i grasyas a su prodijyozo dinamizmo, su intelijensya i sovre todo su avyertura verso el avenir, el kumplio grandes adelantamyentos en el kampo kultural, durante su primer mandato.
Todo komo sus predesesores: Jak Veissid (ke su alma repoze en paz) i muestro infatigavle i kerido Bension Pinto, prezidente onoraryo a vida, Silvyo dyo una importansa prioritarya a la observansya de los prinsipyos relijyozos ansi ke al lavoro karitativo i sosyal de muestra kolektividad.
Ansi, desde unas kuantas dekadas, se kreo en muestra komunidad una larga kavena sosyo- kultural, i kada muevo komite adjunto segun la konjektura i las oportunidades de la epoka, muevas vizyones, muevos proyektos, muevas realizasyones.
El Sefaradizmo, por egzempyo, konose en este momente un muevo impulso en muestra sivdad grasyas a la inisyativa de Silvyo Ovadya de krear ofisyalmente el ”Sefarad Kültürü Araşt?rma Derneği” un lavoro de grande importansa echo kon la presyoza kolavorasyon i debasho la direksyon de Karen Gerşon Şarhon.
La aktividad es grande en el kampo de las investigasyones historikas de muestra kolektividad, i se ve de mas a mas la organizasyon de konferensyas sovre el sujeto, krasyon de atelyes de lavoro, publikasyon de muevos livros , arreglamyento (de una manera profesyonal i syentifika) de la biblioteka del Gran Rabbinato, ets... ets...
El primer mandato de Silvyo Ovadya fue igualmente muy fruktuozo en varyos otros kampos, komo lo fueron los de sus predesesores.
Ansi sera syempre muestra komunidad , kontinualmente, avyerta sovre el avenir i en mizmo tyempo profundamente atada a sus prinsipyos i tradisyones.
