Munchos tenemos de akeyas baskulas ke mos pezamos de vez en kuando. Una munchidumbre de shifros korren, a la fin la alguja keda ensima de un shifro indikando el “kilo” muestro. Si esta alto, topamos diversos pretekstos: “esto komyendo komo otra djente, no se deke me esto engodrando, myentres ke los otros no!” Keridos amigos, oyemos djente ke dizen, afilu si beven agua, toman kilos ets...Estamos remarkando de mas en mas, personas keshozos de “obezite”. Paralelmente, esta pujando la popularidad de diversas formulas de dieta, por lo mas yerradas... Estan pretendyendo azer aflakar en un tyempo rekor ets...Kualo preferash? Tener un puerpo saludozo o meldar en el pezo o baskula, un shifro chiko?..Alora syenteremos la Sra. Kenar:
“No desh muncha importansa a diversos metodos o formulas de aflakar en ”kurto tyempo.” Por egzempyo, estan pretendyendo ke puedesh dar 4- 5 k.g en una semana. Komo? Kon un rejim muy prove de kalori, una alimentasyon insufizyente. Estan propozando diversas dietas, seya, de kafein o de frutas, i likuido, o dieta de supa de kol ets...Todas estas son dietas non ekilibradas, en kualas se da kilos solo de agua, i de los musklos. En desparte, la “metabolizma” se aze mas avagoroza, lo ke fasilita el retorno de los kilos a su lugar!... Rezultado: difikultad de dar kilos en el avenir.”
Keridos lektores, mas despues, la espesyalista mos esta pintando un tablo bastante eskuro. Veremos: “En las personas sigiendo rejimes de este djenero estamos konstatando dezrepozos de dijestsyon i nörolojikos, problemas de anemiya, kanserya, mareyos, enguyos (bulantı)ets. Estas dietas ke se azen al nombre de aflakar, en largo termo (uzun vadede) devyenen la kavza de munchas hazinuras.
Al lado de los danyos fizikos, estan kavzando i problemas psikolojikos. Vimos ke uvo una pujita de olvido, inatansyon, depresyon, de insomniya,(uykusuzluk) i munchos otros dezrepozos. La performansa profesyonal amengua. Se deve konsiderar, i no olvidar ke la pyedrita de kilos, puede ser tambyen rezultado de alguna hazinura, non sospechada. Lo ke sinyifika ke los kilos ke se estan pyedrendo, no es syempre solo de la alimentasyon insufizyente. Alora, las dietas yerradas van a ser un aumento (artış) de mas, para estos problemas de salud.”
Komo ya lo savemos, en invyerno se toma mas muncho kilos. Esto puede provenir seya de una alimentasyon rika de kaloris , o de mankura de aktividad. İ, ampesamos a ver en la T.V, en los jurnales, modos i maneras de reklamas de dietas, kaji “fenomenal!!”. Asigun La Sra. Kenar, en estudyando atantivamente estas dietas, se ve ke son de “senso uniko” (tek yönlü), insufizyentes, i dezekilibradas. “Pensar ke estas dietas standardas, pueden konvenir a personas de kada edad, o kilos, es grande yerro. Aflakar... Esto se deve azer debasho el kontrolo de un dietisyen, i un doktor espesyalisto. Kon un program de egzersizyos i alimantasyon derecha. L’importante no es de ver syempre chikos shifros en el pezo, ma adelgazarse, en pyedrendo lo demaziya de “godrura”(yağ dokusu). Todas las metabolizmas no lavoran de mizma manera. Par konsekuensa, kada persona deve segir un program adaptado a su kondisyon.”
Ay metodes komo akupunktur, masaj, mezoterapi, o kuras de aflakar. Asigun los dietisyenes, estos sistemas pueden dar un rezultado, ma no turavle, si no trokash vuestras uzansas en el pranso, i no azesh bastante egzersizyos. Las dietas no deven ser por una poryoda kurta. Reushir a konservar el kilo ideal es mas importante de dar kilos. Es en tomando la uzansa de una alimentasyon sana i derecha, ke se puede parvenir a un rezultado satizfazyente.
