Kuando vos suvish al koshe de kavayos (fayton), el bruido de la sivdad i el humo de los otomobiles desparesen por entero. La sola koza de vasha sinter es el aver limpyo, la golor de las rozas i la boz de los kavayos.
Las viejas villas ke se alargan de las dos partes de la grande kaleja Nizam, vos yevan al pasado, a un mundo de fantasia. Ken save kuantos personajes selebres bivyeron en estas villas! Kada una de estas villas, ande los intelektuales i los eskridores del Emperio Otomano moraron, tiene una istoria diferente. La villa Iliaskos ke fue konstruida por un grego, Konstantinos Iliaskos, fue la morada del judio revolusionario Sovietiko, Leon Trochki, kuando estuvo en egzilio en Prinkipo.
La otra parte de la isla es la grande kaleja Maden. Komo en Nizam, de las dos partes de Maden, se alargan las viejas villas. En el empesijo de Maden, en la rejoin Kumsal, se topa la Sinagoga ‘Hesed Le Avraam’. Fin el anyo 1903, las orsiones de Shabat i de las fiestas se aziyan en una kaza ke la komunita judiya aviya alkidado. Un diya ke se estava selebrando una Bar Mitzva, el posedor de esta kaza disho ke no esta puedyendo mas rezistir este bruido i los echo de su kaza. Duspues de este evenemiento triste, un komersiante riko, Avraam Fresko izo una donasion a la komunita i les dio su terreno para ke konstruizen una Sinagoga. En el anyo 1921, komo la populasion judiya de Prinkipo aviya pujado muncho, la komunita destruizo la Sinagoga vieja i konstruizaron una Sinagoga mas grande en el mezmo terreno.
El Klub Anatolia (Anadolu Klubu) es el mas viejo i el mas luksiozo klub de Prinkipo. Kada vez ke Ataturk viniya a Prinkipo, se kedava en este Klub. El puevlo de la isla abashavan al debarkader para verlo de serka. Los bayles, los tangos kontinuavan fina demanyana.
La plaj Yoruk Ali i la plaj Naki Bey son las mas viejas plajes de Prinkipo. En los anyos dalkavo, muevos ‘Beach Club’es se adjuntaron a estas plajes.
El Monasterio Aya Yorg,i ke es el mas alto punto de Prinkipo, es el lugar preferado de los turistos. Las noches de Alhad es muy difisil de topar una meza vaziya en los restoranes ke se alargan en el bodre de la mar, allado del debarkader. De la otra parte, los kafes son yenos de djente bevyendo te o kafe en asperando ke venga la ora del vapor. Las patiserias en el kontorno de la famoza Torre de Ora (Saat Kulesi) son tambien yenas de djente en kada ora del diya.
Es emposivle de topar una kamarete en el Otel Splendid i en el Otel Princess sin azer rezervasion de antes una semana.
En enverano, el tiempo pasa presto en Prinkipo. No se entiende kuando se aze denoch,e partikularamente por las kreaturas i los ayedados. Komo la isla parese a un vilajio ande no ay trafik, las kreaturas i los ayedados, invierno entero, asperan a kuatro ojos, ke venga enverano para yirsen a Prinkipo.
