Dora NiyegoPor aleshar del bruido de la sivdad, el solo alternativo es de yir a las islas de Estanbol. Si vos suvish al vapor de Bostanci, en medya ora ya estash en Prinkipo (Büyükada), la mas grande de las islas de Estanbol.
Traduksyon- Adaptasyon: Coya DELEVİ
“En tyempo del Bet A Mikdash el sigundo, el diya de 15 de Av era una fyesta popular, ke las ijas de Yisrael saliyan a baylar en las vinyas, vestidas todas de blanko. Naturalmente munchos despozoryos se fiksavan en akel diya, komo ”rezultado” de los ermozos bayles.”
TU BE AV...DİYA DEL AMOR del JUDAİSMO
Ampesi kon la sitasyon del Sr. Yehuda Hatsvi, aparesida en un numero anteryor de “El Amaneser”. El mez de Av es konsiderado komo peryoda de destruisyon i de luto. Ampesando del 17 Tamuz, asta el 9 de Av, tres semanas son diyas de dolyo. Las destruisyones del Primer Templo por los Babilonyanos, i del Sigundo Templo por los Romanos akontesyeron en un 9 de Av. Koensidensa trajika, i el termo fiksado por el “Dekreto d’Ekspulsyon” en 1492, eskapo en Tisha Be Av.
Av no es solamente un mez de dolyo. Asigun el artikolo “The Meaning of Tu be AV”: “Sej akontesimyentos pozitivos se realizaron en el 15 de Av, azyendolo diya de festividades en el kalendaryo Djudio.” Es difisil de nombrarlos en este kurto artikolo. Oy vamos avlar solo de TU be AV, la fyesta del Amor. Tengo diversas fuentes (kaynakça) relativas a este diya, ke en mayoriya son de un karakter mas o menos relijyozo. Por evitar algunos yerros, me esto referando a syertas sitasyones.
La unika fyesta judia de los tyempos antiguos en el mez de AV, era el 15 del mez en el kual las muchachas de Yehuda saliyan a dansar en las vinyas. Los jovenes bushkando espoza, saliyan tambyen para elijir una...Rabbi Shimon Gamliel disho en la “Mishna”: “No uvo otros diyas tan buenos para Israel, komo el 15 de Av, i “Yom Hakipurim”, en los kualos las jovenas de Yerushalayim saliyan kon vestidos emprestados para no averguensar a las ke no teniyan remedyos.” Kere dezir, eyas vestiyan fostanes blankos ke no eran suyos, por no afishar sus kondisyones de ijas rikas...
Bueno, kualo sinyifika Tu Be AV, ke lo aze ekivalente de Yom Kippur? Muestros savyos dizen ke Yom Kippur simboliza la Nasyon Djudia pedronada por el pekado de aver adorado la Vakita de oro. Es el Diya ke, finalmente El Todo Poderozo acheto los argumentos de Moshe Rabenu por el pardon de su puevlo...El Diya, ke Moshe abasho de la montanya kon las muevas “Tavlas.” “No ay mas grande kontentes de ser pedronado por los pekados,” dizen los savyos. “En Yom Kippur por el pekado de la vakita de oro, i en Tu Be Av, por el pekado de los dodje eskulkadores (gizli araştımacılar) ke fueron investigar la tyerra de Kenaan.” (*) Es por esta razon ke Tu Be Av es ekivalente de Kippur.
En el kalendaryo Djudio, Tu Be Av , tradisyonalmente marka la fin del enverano i de las fyestas Djudias del anyo...Syendo el 15 del mez, es nochada de lunar, komo uzamos a dezir“ La Luna en kinze” (dolunay). Una semana mas antes, Tisha Be Av mos aze akodrar muestra Historya trajika. La luna en kinze de Av, es dicha simbolizar la transformasyon del dolyo en alegriya.
Desde los tyempos Biblikos el 15 de Av fue selebrado komo fyesta de amor i kerensya. En Israel moderno, es una manera de “St. Valentine’s Day”.Naturalmente Tu Be Av es muncho mas ansyano i se selebra kon mas “sobriedad” (ağırbalılık). En este diya se uza mandar a la kerida un buketo de trandafilas koloradas. A traverso el Pais, se organiza partis, se kanta pedasos romantikos. En desparte, para los Djudios, Tu Be Av es una data popular de angajamyentos, i proyektos de kazamyentos.
(*)- El lektor puede referarse al No. 28 de “El Amaneser”, pajina de ”Las Perashas de Rav Adoni” ande este pasaje esta relatado en la Perasha “ SHELAH”.
