Los mansevos estan en la sivdad, seya en el lavoro, seya en los estudyos. Todos sus amigos endjuntos para pasar el tyempo las noches.
Komo troko el tyempo!... En muestra manseves mos tresaliyamos de iyir a las adas i pasar el enverano.
Enfin; la isla es un pedaso de tyerra ke es entornada de la mar de las kuatro partes. Ay personas ke se syenten asolades de la vida de la sivdad.
Se puede dizir ke la isla es un egzilo volontaryo para muncha djente. Ma mozotros, los namorados de las islas, vamos i vinimos kon los vaporikos.
Para mi i mi marido es un paradiso ke egziste en una ora de distansya de la sivdad.
La isla es mas valutosa de una djoya para los namorados.
En Burgaz; kaminando en el bodre de la mar, se puede ver las vedruras, los arvoles enklinandosen fina el bodre de la agua, los peshkados nadando, las rozas de munchas kolores, los arvoles de frutas, el syela klaro, kolor blu, el sol kayente, los pasharos bolando i munchas otras maraviyas de la natura.
A la fin de la semana alkilamos, ken unos kuantos amigos una barka (tekne) bastante grande ke toma a la menos 16 personas, para profitar de la mar limpya i limpida (berrak).
La mar limpya tyene savor; i nadar da un optimismo a la persona.
Alhad demanyana los amigos mos topamos para salir al kamino kon la barka.
Todos se okupan kon una koza, unos emplean lo ke se va komer a midi, otros merkan las bevyentas, otros la fruta i kuando ya se eskapo todo; mos suvimos para debarkar a las 12 de midi.
Komo somos muchedumbre (kalabalık), kada uno kita una boz diferente.
Ay djente ke tadra 10 puntos, los otros se inyervan.
Otros ke keren trayer a sus ijos; kale asperar el vapor ke va vinir de la sivdad.
Los ke son muy puntual (dakik) no keren peryer ni un minuto del sol i de la mar.
Esta semana tuvimos komo envitados los kosfuegros de muestros amigos keridos.
Kuando eyos, arivaron a la barka, mos dimos a konoser unos kon los otros.
En primera; muy respektuosos i avlando kon distansya; en poko tyempo mos izimos intimos.
Las oras del komer de midi; es onores, es servirlos, azer los platos; lo ke se puede azer en una barka.
Despues frutas, dulsuryas i kafes. Ya se izo las onores menesterozas, no es fasil de aresivir kosfuegros, Kreygo ke estuvyeron kontentes de muestro kom porto.
Todas las personas tenemos manyas ke dezeos diferentes. Para pueder kontinuar a estar endjuntos ser amigable; kale tener i saver dar la kerensya emprimero.
La kerensya es el refleto de la voluntad del dezeo, (sevgi gönlün yansımasıdır). La kerensya es un esforso (çaba) chiko; para asosyar los sentimyentos, entre diferentes karakteres de personas; es un entendimyento (anlayış) entre amigos.
La kerensya no se ve, se syente; no se oye, se persive (algılanır).
Para pueder bivir la kerensya; kale tener la sinseridad (içtenlik); la intimitad (samimiyet) i la frankeza.
Todas las ermozuras tyenen komo orijen (kaynak) el interyor de las personas.
Kerer byen; es aleshar de interpretar (yorumlamak) los penseryos diferentes de las personas.
Kon estos sentimyentos de amigable, pasamos unos dias alegres; en meldanda, avlando entre mozotros, komyendo, entrando a la mar, bevyendo kafe, repozando i djugan scrabble.
Es un privilejio de bivir en la isla, en este aver limpyo, sin bruido i leshos de los problemes de la sivdad.
La vida en la isla Burgaz es un sentimyento ke no se puede dar a entender; ma kale bivir yena yena el enverano; i kale sintirla aryento del korason.
Para pueder bivir orozos; tomaremos plazer de todo mizmo de une koza muy chicka.
Tomaremos plazer de todo, de la sanedad emprimera.
İ las adas ke no mos manken.
