Un manyana de Shabat del anyo 1986, en el Kal Neve Shalom
Klara PERAHYAAy de esto 21 anyos, la komunidad de Estambol se topo frente kon frente kon el terrorizmo de esensya rasista....Fue la primera vez en muestro payis ke ombres i mujeres, ijos i ijas yoraron por un marido, un padre o un ermano matado en un lugar de orasyon... la primera vez ke, al nombre de la relijyon, sangre de inosentes profano el marbolo puro de una sinagoga...
Unos kuantos kreentes , al momento el mas intenso de la tefila, prosternados delantre el Santo Bendicho El, fueron molestados kon salvajeria, por manos kriminales deskonosidas, sin razon ni motivo de odyo personal.
Mujeres, kualas mansevas, kualas aedadas ke asperavan el retorno de sus marido en la dulsor de una de estas manyanas de agosto de "al tyempo", ainda kayentes ma arrefreskadas por un chiko soplo de ayre... i en supito, brutalmente, el horror de ambezar la pedrita del kerido el mas serkano... una dolor ke eyas no konosian, no pudian imajinar, echa de konsternasyon, komo una terrivle ferida al fondo mizmo de sus "ser".
Me akodro, i esto nunka desparesera de mi memorya, la ekspresyon de sorpreza de una vyeja mujer, la boka avyerta, en sus ojos la mizma angustia, sovre sus mushos mudos, sin boz, la mizma kestyon ke solo eya pudia oyir “deke?”
Komo kada manyana de Shabat eya avia aparejado la meza de dezayuno, afin de onorar el dia santo, platos, pirones i kucharas de mued i entre munchas otras kozas, komo de uzo, borekas i biskochos de levadura... En su korason esta alegria mesklada de una imperseptivle anksyedad ke fue de syempre el loto de la mujer Djudia, los ojos fiksados sovre la puerta entornada por ande entrara el balabay de kaza... ma esta vez fueron dos ombres ke entraron, la kara blanka, para anunsyarle la desgrasya...
Para munchas personas este sanglante evenemento kedo en sus memoryas komo un akontesimyento trajiko... para otras una dolor ke destruyo sus vida, una amargura de kada minuto, un espanto sin facha ni simbultura.
