Kuando se mira de ariva, de la vista de pasharo, Halki parese a una alforja (heybe) ;por esta razon, le dieron el nombre Heybeliada a esta isla.
La isla Halki es situada en medyo de las otras isles i konsiste de kuatro kolinas (tepe).
El kompozitor Yesari Asim Arsoy kompozo la kantika “Biz Heybelide Her Gece Mehtaba Cikardik” (Mozotros en Halki kada noche saliyamos al lunar) porke dizen ke el lunar se ve el mas klaro de Halki.
En los anyos 1940, aviya, aproksimado 250 famiyas en Halki los enveranos. En estos anyos, el menester de fraguar una Sinagoga en la isla fue obligatorio. Kon la donasyon de 10 000 liras, del filantropisto Josef Bozaldo, la komunita judiya merko un terreno en la isla, ma por ampesar la konstruksion de la Sinagoga, kaliya pasar los obstakulos de la burokrasiya. Kon el soporte del disputado (milletvekili) Salamon Adato, las permisiones legales fueron tomadas i en el diez del mez Juno del anyo 1956, un diya de Alhad, la Sinagoga Beth Yaakov se avyo al servisio del puevlo judiyo.
La isla Halki es yena de verduras. Kuando vos vash a Camlimani, ke es yena de pinos i ke tiene una muy ermoza vista de mar, vos parese ke estash en el paradisio.
Kuarente anyos antes, kuando yo era una ijika, los enveranos me iva a Halki, a kedarme unos kuantos diyas ande una amiga. Las demanyanas mos ivamos a la plaj. Ismet Inonu, uno de los viejos reprezantantes de la Republika Turka, pasava los enveranos en Halki. (Oy su kaza se transformo a un muzeo). Kada diya Ismet Inonu viniya a la plaj para tomar banyos de mar. Un diya ke Ismet Inonu iva saltar a la mar del tramplen, el puevlo se arekojo en el tramplen para verlo de serka. Enduna el tramplen se derroko i todos se kayeron a la mar. Akel diya, uvo unos kuantos firidos.
Las noches, el mas grande plazer de la manseves era de yir a los sinemas de enverano. En beviendo gazoz kon leblebis aryento, i en komyendo pipitas miravamos el filmo, i aziyamos lo mas muncho bruido posivle. En las senas de amor, el sinema se inchiya del bruido de los chufletes de los mansevos.
El Seminario de los Ortodokses, ke es uno de los mas emportantes institutos de edukasion en el mundo, es la mas grande razon de las vijitas de los Gregos.
Kuando vos aserkash del debarkader, el edifisio blanko ke se ve en la siedra, es la Eskola de los Marineros de la Armada Turka. En la derecha, los restoranes de pishkado se alargan en el bodre de la mar. En la kaleja de atras, se topa el Bazar, los Kafes i la Taska (meyhane). La grande Eglisia de los Gregos es serka de aki. Si keresh suvirvos a un koshe de kavayos i azer el torno de la isla, kale ke pasesh de los kafes. Munchas vezes, puedesh rankontrar aki Orhan Pamuk (el eskritor Turko ke gano el premio de Nobel del anyo 2007), asentado en el bodre de la mar, eskrivyendo un livro en sorbiendo su te. “Ay sukuenta anyos ke paso los enveranos en Halki” esta dizyendo Orhan Pamuk. “Esta isla es muy diferente de las otras. Las otras isles son yenas de puevlo riko ke keren amostrar sus rikezas. Halki es la mas modesta i la mas kalma de las isles ande puedesh pasar las vakansas, sin tener dinguna penserya de kualo vistirvos kada diya. Aki es el lugar ande topo la inspirasion de mis livros”.
Un diya si vos vash a Halki, no neglijesh de vijitar el otel Halki Palas, ke es el mas luksiozo otel de las islas. Puede ser ke es un poko karo, ma es el mijor lugar para pasar unos kuantos diyas maraviyozos.
