No pyedrer el atamyento a muestras mitzvot, Fey i Kultura ...Un puevlo ke no konose, no se akodra de su pasado o se alesha de el, tyene un futuro indeterminado. El 15 del Agosto koryente, era “Rosh Hodesh”. Entonses entrimos al mez de Elul ke tyene la partikolaridad de ser el ultimo del kalendaryo ebraiko. Estamos vyendo semana por semana, los “Diyas Temerozos”, aserkarsen...Diyas yamados “Yamim Noraim”, konsiderados komo una peryoda de djuzgamyento, arrepentimyento o regretos...Elul es dicho ser el “Mez de oportunidad”, deke?...Vamos a ver...
El orijen de esta peryoda ampeso durante el “Egzodyo” de los Djudios salvando del esklavaje de Ejipto. Vinyeron al Monte Sinay para resivir la “TORA”. Malorozamente, en el 16 de Tamuz, kometyeron el grande pekado de la “Vakita de Oro”. Moshe Rabenu, abashando del Monte kon las primeras Tavlas de los “10 Komandamyentos” vido los Djudios en idolatriya. A la vista de este renyegamyento, de blasfemo, “Se ensanyo”, echo las “Tavlas” de pyedra i las rompyo. Era el 17 de Tamuz (ƥ).
En el primo de Elul, Moshe Rabenu fue “Ordenado” de suvir al Monte Sinay para resivir las sigundas “Tavlas de la Ley.” En el 10 de Tishri abasho kon el sigundo set de de los “10 Komandamyentos.” Esto era la sinyifikasyon del pardon “Selesto” verso su puevlo. Este diya de 10 Tishri fue dezinyado komo “Yom Kipur”, diya de grande pardon. Desde akel tyempo, los diyas entre 1 Elul- 10 Tishri fueron una peryoda espesyal, de egzamen de konsensya, de pedronansa. Elul es konosido komo mez de piadad: “Hodesh Harahamim”...En Elul, el Shofar de las orasyones de demanyana mos aze akodrar ke Rosh Ashana i Yom Kipur estan serka.
En el presipyo del anyo pasado, en estas fyestas, izimos la promesa de amijorearmos. En ke grado reushimos? Es ke por una razon o otra, mankimos a muestra palavra? Malgrado todo, si izimos yerros, faltas, o puede ser mizmo pekimos, El Todo Poderozo mos pedronara si muestro arrepenyimyento es sinsero. Desde el “Rosh Hodesh” de Elul, el Djudio se apareja ( o deve aparejarse??) a un analiz i refleksyon personal, kon sinseridad. Deve azer su oto- kritika, bushkando remedyos de adovar (si se puede dezir ansi) sus faltas o yerros. En una manera, es komo revizar su kondokta myentres el anyo i azer un “Bilanso” moral.
Antes de meter el punto final, aki kero relatar un paragrafo ke tengo tomado de un artikolo eskrito por el Gran Rabbino Moshe Levy: “Los diyas redutavles (Yamim Noraim) konosyeron grande alegriya i momentos de grande entuzyazmo. Fue en Rosh Ashana ke tuvo lugar el estrenamyento del “Templo de Yerushalayim” por el Rey Salomon (Shelomo Ameleh)”... Keridos lektores, me esto rendyendo kuento ke mi teksto fue diferente, un poko mas seryozo ke de uzo. Deve ser unikamente achakes la “Solemnidad” del sujeto, i de las fyestas ke estan aserkando. Eskaparemos en repetando: “Elul es la oprtunidad del anyo...”
P- S- Meldi en un teksto ke, Los Raves mos tyenen dicho ke Elul es el “Akronimo”(Ʀ) de: “Ani Ledodi, V’Dodi Li”, una fraza de “La Kantika de Las Kantikas”...Es tyempos de aboltarmos kon “Amor” verso D., i resivir en retorno su “Amor”...C- D.
(ƥ)- Es el diya de Taanit de “Shiva Asar Betamuz.”
(2*)- “Acronyme” es un byervo formado kon las primeras letras de una fraza.
