En el diya de Rosh Hashana, ke es el empesijo del anyo muevo, El, kon su buena entision, mos ofre un anyo muevo. El, mos da una otra oportunidad de reushir a azer kozas grandes, de pueder krear una diferensia en muestra vida.
En este diya grande, kale ke mos demandemos estas kestiones: “Deke esto biviendo yo?” “El Dio me esta dando la vida para reushir kozas buenas por la humanidad i por mi mezmo”. “Eske esto echando mi vida en vaziyo”? “Kale ke tenga un buto en la vida i kale ke lavore para realizar este buto”.
El diya de Rosh Hashana, El Dio juzga el mundo i las personas. En este diya grande, El determina la emportansia de la egzistensia de kada persona. Kada anyo, en Rosh Hashana, kada persona ampesa una vida mueva, kon una vision mueva por el futuro.
Rosh Hashana sinyifika un empesijo muevo por la persona, komo ke no tiene dingun pasado. El Dio mos da la ambision i el dezeo de djugar un rolo aktivo en su Reyno, en el anyo muevo.
El Dio kreo el mundo porke las personas tomen plazer. Es el dirito de kada uno de mozotros de tomar plazer de todos los benefisios ke el Dio mos esta ofriendo.
Rosh Hashana es el diya del aniverserio de la persona. Kada Rosh Hashana, El Dio krea de muevo la persona ien esta fiesta, kada uno de mozotros, devemos de ganar de muevo el dirito de bivir.
Es neseserio de pordonar maestro pasado i de no transportarlo al futuro. Segun la tradision judiya, ay siempre la posibilidad de reparar muestros kondaktos.
Rosh Hashana es la fiesta de la alegriya de renuvelarmos, de azer un plano por el futuro, de krear un mundo muevo.
En esta fiesta, se kome frutas tradisioneles. El primer diya de Rosh Hashana, un pedasiko de mansana se unta al mile, kon la esperansa de tener un anyo dulse. El sigundo diya, una fruta de la mueva sezon se kome en azyendo Shehiyanu. Ay diferentes frutas i diferentes legumbres sembolikos, ke se komen en esta fiesta. Datil (hurma), granada (nar), puerro (pirasa) i remolacha (pancar) son unas kuantas de estas.
I este anyo, komo kada anyo, oguramos a todos los judiyos en el mundo entero, de tener un empesijo muevo yeno de esperansa; un anyo dulse kon sanedad, alegriya i pas en el mundo.
