Klara PERAHYAAy de esto dos semanas, numerozos kotidyanos i televizyones de Evropa eskrivyeron i mostraron durante unos kuantos dias, la fotografia de un ijiko de 11 anyos ke fue matado en Londra, por mansevikos enteramente deskonosidos, sin ninguna razon palpavle.
Coya DELEVİ
Seya en “El Amaneser”, o en esta oja, seya en otras publikasyones, tuve la okazyon de eskrivir sovre Estambol. Por lo mas, eran tekstos nostaljikos, sentimental o relasyonados kon mis rekuerdos. Meldimos tambyen, artikolos de otros amigos, referandosen a bushkidades istorikas ets...En pensando bueno, remarki ke saltimos una novela muy importante konsernando muestra sivdad. No esto muy sigura si en las otras ojas del “Şalom” uvo algun indisyo sovre este evenimyento ke, asigun mi deve ser internasyonal.
Se trata de la proklamasyon ke izo en Bruxelles el Novembre 2006, el Konsilyo de Ministros de la Unyon Evropea. Kompuesto de los Ministros de la Kultura, i de un juri internasyonal, este Konsilyo deklaro Estambol komo una de las tres Kapitalas Kultural Evropeas de 2010. Las otras dos sivdades son Essen de la Alemanya, i Pecz de la Ungariya.
Komo se ayego a esta konkluzyon? Naturalmente se traverso un largo “prosesus” antes de arrivar a este rezultado. En el 2000, 13 reprezentantes de diversas İnstitusyones Sivilas, (Sivil Toplum Örgütleri) echaron los primeros pasos. Mas despues, kon la partisipasyon del Ministeryo del Eksteryor, Ministeryo de Kultura i Turismo, de la Munisipalidad de Estambol i de su Governador, esta tentativa gano grande importansa. En el presipyo del 2005 el Primer Ministro deklaro apoyar el proyekto, i dezinyo un koordonador jeneral. Aki seriya muy largo i fastidyozo de sitar uno por uno los personajes i asosyasyones tomando parte en el proyekto.
La tema esensyal estava bazada sovre el fakto de ser un ponte entre las diferentes jeografiyas, kulturas i sivilizasyones. Diferentes seksyones formaron diversos proyektos, todos arrekojidos debasho el konsepto “ Estambol Sivdad de Los Kuatro Elementos”. Fin del anyo 2005, una delegasyon Turka partyo por Bruxelles kon el proyekto, para entregarlo i aderesarse ofisyalmente. El proyekto fue estudyado minusyozamente por el Juri internasyonal. En Marso 2006 la Delegasyon Turka fue envitada a Bruxelles. A la fin de interminavles preguntas i repuestas resiprokas, en el 11 Avril, se anunsyo el rezultado: A la unanimidad, el Juri aviya desidado de “propozar” Estambol komo “Kapitala Kultural Evropea”. Esto era por la ora, una propozisyon i no dayinda, una konkluzyon desiziva.
Komo lo eksprimi mas arriva, la repuesta final del Juri se anunsyo en el Novembre 2006.“Por primera vez un governo esta en kooperasyon kon otoridades lokal (Munispalidad) i İnstitusyones Sivilas en la realizasyon de un proyekto.”Estas fueron las palavras del Primer Ministro. Estambol syendo entonses una de las sivdades kandidatas, se enkargo tambyen, grandes responsabilidades. En primera etapa se esta planeando edifikar muzeos relasyonados kon la Republika, los Objektos Santos, i un Muzeo Maritim.
Entervalo de este prosesus se van a realizar muevos investismyentos de kultura i arte. Estambol va ganar muevos muzeos, muevos domenos de ekspozar ovras artistikas, aktividades kultural. Kon el apoyo i el ayudo finansyal de fondasyones internasyonal, muestra sivdad va pueder mostrar un muevo dinamismo, i en syertos distriktos una mueva facha. Por egzempyo, sinti en las novelas, ke se planeo de derrokar kompletamente el sentro “Tarlabaşı”.(La suvida ke se termina en el Taksim). Los edifisyos, aktualmente en negro estado, van a ser remplasados por fraguas modernas asta el 2010.
Ay i otros proyektos de amijoreamyento, ke probavlemente pueden no alkansar al 2010, ma ke estan en el program...De esta manera, Estambol, en el 21. Siglo va ser pronto para kumplir su rolo de “Ponte” entre los dos kontinentes. Va ser una posivilidad i okazyon inkomparavles para la Evropa i Estambol de konosersen resiprokamente. Esperaremos ke va ser ansi... Finalmente puedo dezir ke, Estambol, entonses deve ser konsiderada komo una Kapitala de la Kultura Evropea.
