Ekonomisto byen konosido al nivel internasyonal, istoryano, ombre de refleksyon de una kultura muy ancha, grande pensador, rasyonal i sensivle a la vez, Jacques Attali es tambyen un vizyonaryo.
A partir de un muy profundo estudyo del pasado i de una analiz minusyoza de los parametros aktuales en diferentes kampos syentifikos, ekonomikos ansi ke sosyo- psikolojikos, el mos traso el tablo de lo ke puedra ser el mundo en 50 anyos.
Bazandose sovre la akselerasyon del ritmo de evolusyon de la Istorya, i tambyen konsiderando el potensyal aktual de la umanidad, kon su adelantamyento syentifiko i tekniko, sus posibilidades de komunikasyon i sus varias tendensyas envezes kontraryas las unas a las otras (de una parte “demokrasia, solidaridad sosyal, konsepto de la libertad i de los derechos del ombre” i de la otra: “terrorizmo, fanatizmo i delinkuensya”) Jacques Attali imajjino lo ke sera en la segunda mitad del siglo 21, la mueva facha del mundo kon su parte de luz i su parte de tinyevlas.
El “Ombre de refleksyon” kalkolo las probabilidades de un mundo kon muevos sistemas de lavoro, muevas metodas edukativas i mizmo muevas distraksyones i migrasyones ansi ke muevos movimyentos demografikos...
En la chika notisya ke se topa al verso del livro, esta notifikado ke en esta ovra Jacques Attali desvela su vizyon de lo ke seran las relasyones entre las diversas nasyones i los trokamyentos ke se produziran en el kampo del lavoro, las muevas formas del merkado, el terrorizmo, la violensya, las perturbasyones atmosferikas,ansi ke la influensa kresyente de la relijyon ets...
Segun el, unas de las mas importantes valores umanas son la Dinyita i la Libertad. I a este sujeto el eskrive: Kuando se observa la istorya sorvre un largo espasyo de tyempo, se ve ke progresivamente eya korye verso una sola direksyon, la predominansya de la libertad individual sovre todas las otras valores.
Para el pensador, la İstorya de la sivilizasyon es la İstorya de la persona otorizada a rijir eya mizma su destino, libre de todo modo de ovligo, salvo del respekto del derecho del otro...
En este livro Jacques Attali no afirma nada, ma mos aze tomar konsensya del potensyal ke egziste aktualmente en el mundo, prenyado de los akontesimyentos a venir...
En una de las pajinas de la “introduksyon”, el mos dize: “El objetivo de este livro es de mostrar ke tala sera la facha la mas probavle del avenir...no la ke yo dezeo.
Eskrivi este livro djustamente para ke el avenir no sea semblavle a mi temor (korku) i para ayudar a la ekspansyon de las formidables potensyalidades ke oy egzisten”.
