En el anyo 1972, uno de los mas selebres futbolistos en el mundo entero, DIDI (Waldir Parreira) fue enkargado (gorevli) komo direktor tekniko de Fenerbahche ke es uno de los tres mas grandes ekipos de futbol de la Turkiya.
Akeyos diyas, la administrasion del ekipo Fenerbahche, se topava en Altiyol (Kadikoy), aryento del Bazar Efes. La butika de merkeria (tuhafiye) de Kemal Levi era situada enfrente de la administrasion de Fenerbahche. Los administratores lo konosiyan muy bueno a Kemal Levi i saviyan ke avla en Espanyol (Ladino).
El direktor de Fenerbahche, B. Fikret penso ke Kemal Levi va ser un buen traduktor entre Didi, los futbolistos i la direksion de Fenerbahche.I ansi, Levi empeso a lavorar komo traduktor de Didi, kontinuando tambien su lavoro en su butika.. Kuando los futbolistos teniyan algun problema kon el ekipo, de vista viniyan a Kemal Levi para ke lo tranfera a Didi. Akeyos diyas, la butika de Levi se aviya echo el sigundo adreso de Fenerbahche.
En poko tiempo, la famiya de Didi i la famiya Levi se izyeron muy entim. Las fiestas de las dos partes se selebravan endjuntos; el Seder de Pesah se aziya endjuntos i las noches de Shabat komiyan endjuntos en la kaza de los Levis. Kuando Didi estava en deplasman kon su ekipo, los Levis se okupavan de su mujer i de su ija chika. Komo Didi i su famiya estavan en un pais etranjero, la kaza de los Levis era komo un puerto ke se refujuyan kuando teniyan desgustos i bushkavan remedios.
Didi lavoro komo direktor tekniko de Fenerbahche entre los anyos 1972- 1975. Durante estos tres anyos i medyo, Didi izo ganar a Fenerbahche dos shampiyonas de liga, una kopa de Turkiya, una kopa del Prezidente de la Republika i otras kopas komo eskritor de sport. Mezmo oy, Didi dayindo es el solo direktor tekniko ke izo ganar tantas kopas a Fenerbahche.
Durante los anyos ke pasaron en Estanbol, la ija grande de Didi ke estava en Brazil, vino a Estanbol kon su novio i se kazaron aki. Naturalmente, Kemal Levi se izo el testigo (sahit) de la novya en el matrimonio sivil (nikah). La boda se izo en la Klisiya Katolika Franseza en Moda.
Todos los patridarios de Fenerbahche tuvieron grande simpatia por Didi. Kuando se suviya a un taksi o kuando entrava a una butika, dingunos no tomavan paras de el. En la kaye, los partidarios de Fenerbahche lo abrasavan i lo bezavan. Duspues de kada enkontro de Fenerbahche, los futbolistos lo yevavan en los ombros. Kuando Didi se iva a la kapitala de la Turkiya por algunos enkontros de futbol, mezmo los komandantes de la Armada Turka kompetiyan para konoserlo.
Didi les ambezo a los futbolistos de Fenerbahche de djugar en aplikando los taktikos del ekipo nasional de Brazil. Este stilo de djugo los izo paryentes a los partidarios de Fenerbahche kon los partidarios Brazilianos.
Didi i Kemal Levi fueron komo dos ermanos en los anyos ke Didi estuvo en Estanbol. Kemal Levi, el padre de Yusuf Levi (un miembro de la administrasion de las Sinagogas de Kadikoy) i de Izak Levi (un filantropisto de la komunidad de Kadikoy) muryo en el anyo 1979. Didi, el selebre futbolisto ke eskrtivyo su nombre kon letras grandes en la istoria de futbol en el mundo entero, muryo en el anyo 2001.
