Karen Gerson ŞARHONLa conferencia de nuestro amigo se titula Foklor komo ideolojia, teatro komo estratejia:La vida i el opus de Laura Papo Bohoreta y tendra lugar en el Instituto Cervantes el 18 de septiembre a las ocho de la tadre:
Keridos Korelijionaryos
Ayegimos i este anyo todos endjustos a la entrada de una anyada nueva donde rogo ke seya yena de sanedad, prosperidad, reushidad i por maz emportante de amor i alegria.
“Tahel Şana Uvirhotea /
Empesara el Anyo i su Bendisyones.”
Esto bien siguro ke kada uno de nozotros meresemos de refudjiarmos a la perdonansa amplia i miserikordiosa del Todo Poderozo dospues ke egzaminimos kon senseridad nuestra konsensya sigun los preseptos de nuestra santa ley akordandomos al objeto de Rosh Ashana i nos konsentimos de nuestros defektos todo en veluntando de eleminarlos.
“Elyon Rahameha Meolam Seliha İmeha İ”
“Alta Es Tu Miserikordia La Perdonansa Enti Es.”
Todo en siendo djusto ke la persona no puede ser imparsial sovre todo kuando se dize de djuzgarse a si mizmo, devemos de kritikar nuestra kondukta sigun los preseptos de nuestra santa ley para arivar a una pas interna i estableser relasiones senseras i armoniosas kon nuestro entorno serkano i leshano.
“Veyaasu Kulam Aguda Ahat Lasot Retsoneha
Belevav Shalem”
“Formaran Todos Una Djunta Para Afirmar
Tu Veluntad Kon Korason Kompleto”
Espero ke nuestros keridos korelijionarios no mankaran de profitar de esta oprtunidad.
Keridos Ermanos
Profitando de este mesaje de Rosh Ashana kero compartir kon vosotros mis siertos pensamientos i sintimientos:
Enprimero nuestra eskola: Me alegro muncho de ver ke a kavza de los reglamientos kometidos en los ultimos anyos, el ennaltesimiento de su nivel de enstruksion i edukasion i las reushitades ke alkansaron los graduados en los egzamenes de universidad, nuestra eskola vino de ser una de las eskolas las mas prestijiozas en nuestra komunidad. Espero ke no en un muy largo tiempo nuestra eskola va arivar a su yena kapasidad.
Es kon grande plazer ke semos los testigos ke en los ultimos tiempos esta pujando el entereso verso nuestra relijion sovre todo entre los adolesentes donde lo apresiamos este kavzo komo la aseguransa de nuestro futuro komunal. No ay ningun dubyo ke nuestro Rabinato apuye i sostyene de todas las maneras las programas de este entereso todo tiempo ke no se kontrameten kon nuestra vida diaria i nuestras tradisiones i todo tiempo ke son seriozas i son dentro el kuadro komunal.
Kero tambien prezentar mis agradesimientos a los dirijentes i su fonksionarios de Denet Gıda ke toma parte entre kas enstitusiones de nuestro Rabinato por sus kontribusiones de abasteser produktos nutritivos Kaşer a nuestros korelijionarios ke de diya en diya aumenta las variedades.
Uno de los evenementos ke mos glorifika en los ultimos diyas es el konsedimiento de la medalya la mas prestijioza de nuestro Estado o uno de nuestros korelijionarios. Penso ke esto es la prova ke nuestros korelijionarios no mankan de komportarsen patriotos todo tiempo ke se les da la oportunidad.
Keridos Korelijionarios.
El teimpo es tiempo de unidad, solidaridad i sinseridad. La razon ke tenemos de kritikar la devemos aplikarla todo en guadrando el respekto mutual. Vos kero rekordar una otra ves ke todo tiempo ke nos akordamos a este punto fundamental, pudemos tener la razon de estar siguros de nuestro futuro.
Yeno de estos pensamientos i sintimientos vos felisito una otra ves de todo korason a kavza de Rosh Ashana i vos bendigo kon todas las bendisiones de nuestra santa Tora.
“Tizku Leşanim Rabot Neimot Vetovot”
Rav İsak HALEVA
Gran Rabino
