Los pansyoneres i hazinos de estas institusiones fueron muy kontentes de ver al Gran Rabino ke les sueto anyada buena i hatima tova.
En el Barınyurt, el Gran Rabino fue aresivido por Viktor Ülçer, el prezidente, i Nora Uyar, prezidente de la seksion de mujeres. Rav Isak Haleva meldo una beraha i despues avlo a la asistensia por la sinyifikasion del diya de Kipur. Rav Haleva se espartyo del Barınyurt despues de aver visto todas las renovelamientos ke se izo en las binas.
La sigunda vijita fue al Ospital Or- Ahayim. El prezidente Jojo Illel i siertos miembros de la administrasion resivieron a los vijitadores. Rav Haleva se okupo de los hazinos uno por uno, les meldo orasiones para salud buena i les disho ke un buen moral es la yave para sanarse. Los hazinos lo aresivieron al Rabino kon palmas en la sala de terapiya i le demandaron munchas demandas. Algunos ke teniyan el moral basho toparon muevo moral kon esta vijita i partisiparon en las konversasiones. Rav Haleva, su mujer i Mois Kohen izieron una reunyon kon la administraison del ospital i el grupo de ayudantes voluntaryas ke se yaman “Los Anjeles Roz”.
La dalkavo vijita fue al IYD (Bet Zekinim) en Hasköy. El prezidente Hayim Küçük aresivyo a sus musafires. Los pansyoneres entornaron el Rabino kon muncha amistad i alegriya. Rav Haleva avlo kon todos i vijito a los desrepozados a uno a uno en sus kamaretas.
