En una kaza moravan los proprietaryos gregos, en la otra muestra famiya.
Las rozas se enklinavan de las paredes fina abasho. La armoniya de las kolores; kolorado, roz, blanko; la golor de las rozas se sintiya de la punta de la kaye.
Era un tyempo ande aviya; arvoles en las kayes, rozas en las guertas i vedruras, yervas en los çayires. Las personas no teniyan la nostaljiya dainda de la vedrura, de la natura!...
Todo era natural, komo de ermozura!.....
Oy, malorosamente las paredes de beton se apegaron unos kon los otros. Los arvoles estan aprezados (hapsedilmiş) en los parkos. Las kriyaturas en lugar de djugar kon sus amigos en las kayes; estan enfrente de la televizyon i del internet; se konosyeron kon los eroes (kahraman) ke no son verdadores.
Me esto akodrando de los djugos de la chikes ke djugavamos en las kayes. Akel tyempo las ijikas djugavan diavolo. Una makara entre dos palos atados kon una kuedra delgada. Se aziya mil i una akrobasiya kon la makara.
Djugar a pye kochiko (seksek).
El djugo de eskonder (saklambaç) i munchos otros...
Las personas ke se olvidaron de riyir; se apegaron a los telefones. La kerensya se izo falsa (sahteleşti).
Enfin; antes kuarenta anyos todo era mas natural, i penso ke todos eran mas orozos. Mizmo ke mos mankava unas syertas kozas ke dezeavamos las kriyaturas, tomavamos plazer de todo.
Muestra kaza era de tres etajes. A la entrada, en el koridor; aviya lajas grandes pretas i blankas komo el djugo de dama; ande djugavamos i baylavamos. A la derecha una kamareta de asentar; ande se komiya enriva de una meza de tavla; de detras un yukri (dolap) ande se metiya los pirones, kucharas, chinis i la vidreriya. Teniyamos un kantaro de agua de kovre. A todos mos plaziya bever agua de este kantaro; porke la agua kedava freska. A la syedra una tinaja muy grande ke teniya una valor antika; i tomava trenta tenekes de agua. A la fin del koridor una kozina grande ke teniya una puerta de ande se saliya al kortijo.
En el mupak; aviya una ornaya ande se metiya un ogar para gizar las komidas. Un vestibulo (sofa) grande; ande se komiya entrel diya para no ensuzyar la kamareta de asentar. En suvyendo la eskalera una kamareta de echar kon una vista de mar maraviyoza, i por atras otra kamareta ke mirava a la guerta kon arvoles de avramilas i de igos.
En el treser etaj, una entrada bastante grande kon dos ventanikas; ande los ramos de los arvoles se enklinavan fina estas ventanas.
Kon mis primos i primas mos suviyamos a los arvoles i los igos ke arekojiyamos los metiyamos en un sesto al bodre de la ventana.
La golor de los pinos entrava por estas ventanas.
Komo pasavamos el tyempo sin televizyon, radyo, i komo estavamos orozos!...
Mizmo ke munchas kozas trokaron en las islas; komo por egzempyo; ya se dize ke no ay mas kazas de tavlas vyejas, en lugar de estas kazas brodadas komo dantelas, se esta fraguando apartamentos de beton.
En lugar de rozas i arvoles; las pisinas para pueder nadar. Malgrado ke la mar no es leshos; las personas estan preferando no lo natural, ma lo artifisyal.
Esto es la preferensya de oy.
Estamos bivyendo en un tyempo muy moderno, muy diferente de muestra manseves. Los mansevos estan lavorando duro, i no keren vinir mas a las islas. Estan bivyendo una vida asolada en el doredor del echo, internet i amigos.
No les esta enteresando; las ermozuras naturales; las vedruras, la mar limpya, los arvoles ke son emportantes por un aver limpyo,.... Eyos en los kafes, las pisinas, los sinemas, en los sentros del empleo (alışveriş merkezi), estan enkarselados en lugares serrados sin aver, kon el fumo de los sigaros.
Ke pekado!.....
Enfin, la sezon de las islas ya se eskapo. Komo ya pasimos las fyestas Rosh- Ashana ke es el presipyo de anyo (yılbaşı), i Kipur; para pueder adjuntarmos la famiya entera vinimos a Estambol. En Kipur ya orasyonimos para demandar pardon al Dyo; de los yerros ke akumplimos durante el anyo.
İ ya ayegimos a la fyesta de Sukot.
Sukot es una fyesta ke durante una semana kale asentar i komer aryento de la Suka para kompletar los ordenes (emir) de la Tora. Vamos a fyestar Simha Tora djugeves la noche.
Vos oguro keridos lektores; una anyada buena, hatima tova, hag sameah.
Tizku leşanim rabot...
