Benbanaste nasio en Ortakoy en el anyo 1915. El padre de Benbanaste, Samuel Efendi era komandante mediko de la Marina del Emperio Ottomano. Marko Benbanaste izo sus estudios en la eskola primera Saint Louis en Yeldegirmeni i en la Eskola Italiana en Kadikoy. En el anyo 1932, Benbanaste lo perio a su padre en un aksidente. Duspues de la muerte de su padre, desho la eskola i empeso a lavorar allado de un dantisto. En dos anyos, se ambezo munchas kozas sovre este ofisio.
La passion de Marko para la edukasion nunka no se perio. Keria estudiar medisina komo su padre, ma teniya difikultadedes finansieras. Se adreso a la eskola italiana de muevo, para pueder dar los egzamenes de lise de afuera. Reusho estos egzamenes, ma su diploma no fue akseptada por las universidades turkas porke no meldo estas klasas. Benbanaste se adreso a la eskola de medisina de Roma i resivio una pension (burs).
En Italia, akeyos anyos era la epoka de Musolini. El antisemitizmo aviya empesado a ekpenderse (yayilmak) en el pais. En estos dias, un jurnalisto judio de los Estados Unidos aviya vinido a Italia para azer una entrevista kon Musolini. En la entrevista, Musolini le disho: “Kada uno esta avlando del antisemitizmo en la Almanya. Esto me esta azyendo riyir. La ermozura de una nasion es kuando las rasas (irk) se mesklan una kon otra. El antisemitizmo es barbarizmo”.
Kuando Benbanaste estava en la Universidad de Roma, su ermano aviya eskapado la Eskola Italiana i keriya entrar al komersio. Ma Marko no lo permetio. Marko lo envito a Roma i le ayudo para ke estudye medisina en Roma. En el anyo 1939, su ermano Izak torno a Estambol i eskapo sus estudios de medisina en Estambol.
En el anyo 1941, Marko Benbanaste resivio su diploma de medisina de la Universidad de Roma kon una marka de antisemistizmo enriva: “Di rasa Ebraika”. Por amostrarles ke el se esta sintiendo orgoyozo de ser judio, sinyo su disertasion no solo komo Marko Benbanaste, ma kon la sinyatura Hayim Marko Benbanaste.
Benbanaste publiko vente artikolos en enternasional jurnales sientifikos. Resivio su grado de profesor de la Universidad La Sapienza en Roma. Mas duspues, sus diplomas fueron akseptadas en la Turikiya.
Dr. Benbanaste dediko (adamak) su vida entera a prokurar (saglamak) servisios a los hazinos. Duspues ke torno a Estambol, lavoro mas de ventiocho anyos en el opital Haydarpasha Numune Hastanesi, ande izo mas de kuatro mil operasiones sin ganar ni un grosh. Mas duspues, kontinuo sus servisios en los distriktos Moda, Osmanbey i Gayrettepe.
Allodo de su ofisio de mediko, Benbanaste teniya una vida sosyal muy rika.Komo vasha ver en la letra de Ismet Inono adresada a el, Benbanaste teniya muy buenas relasiones kon politikos.
Ke este en ganeden.
