SOVRE LA İNTELİJENSYA DJUDİA...

Se anunsyo los ke ganaron premios Nobel, en diversos domenos. Ay munchos nombres djudios... Me  mandaron en pasadas de Israel un teksto  enteresante, para meldarlo. Konstatando su aktualidad dechidi de tresladarlo en akurtando i adaptandolo un poko... ?

Coya DELEVİ
El teksto orijinal  “Why Are Jews So Smart?” (Porke los Djudios son tan intelijentes?) es sinyado L.Regenstein. Parese, a primera vista, un poko egzajeredo, por no dezir utopiko, aun ke esto d’akordo kon diversas ideas del autor. Deke los Djudios son tan intelijentes? Durante siglos esta pregunta eksito la kuryozidad de los investigatores. Munchos portanto estan konservando sus septisismo. Se demandan si en verdad ay validez en este kreito tan esparzido, atestando la intelijensya de los Djudios... Son mas meoyudos ke los otros puevlos?..
Sin dubyo, munchos  Djudios fueron reprezantados en diversos domenos entelektual, literaryos, sensyas ets...Es de enkantar, komo puede un grupo numerikamente tan chiko, produizir los individuos mas intelijentes del mundo? Komo se save, ay personajes istorikos entre los Djudios, ke desharon indiskutavlemente sus trasas para la Umanidad. Avraam Avinu: su vida i sus preseptos konsiderados sakros por los Djudios, ansi ke los Muzulmanos i Kristiyanos. Moshe Rabenu, ke dyo la Ley al puevlo Ebraiko .Se puede sitar mas munchos... Basta solamente echar un ojo al 20. Siglo. Puedemos ver el importante rolo ke djugaron los Djudios en la formasyon del muevo mundo.( si no syempre en senso pozitivo) (ƥ)... Aki sitaremos el famozo fizisyano Albert Einstein, el padre de la “Psikanaliz”:Sigmund Freud. Tambyen los medikos Dr.Jonas Salk i Dr. Albert Sabin ke desveloparon el vaksen del polio, son Djudios.
Las teoriyas de Einstein fueron un manadero de inspirasyon para el desvelopamyento de la bomba atomika por Felix Bloch, Niels Bohr, Robert Oppenheimer i otros...Komo  afirmimos mas arriva, syempre no fueron en una direksyon, komo dezir, pozitiva. En este senso se puede tambyen sitar el padre del Komunismo, Karl Marx... Reelmente los Djudios fueron dominantes en el domeno de la “Fizika Nuklear” en la Evropa, ampesando desde 1930. Fue una epoka ande los lavoros se nombraron komo “Fizika Djudia”... İ aki, una pretensyon! Ay indisyos afirmando ke Elvis Presley tyene ansestros Djudios... Probavlemente, en la Historia, los Djudios no fueron syempre muy popular. Ma, dingun puevlo no reusho a aserkarse (proporsyonalmente s’entyende) a sus kapachidades i  ovras. Tenyendo karakteristikas byen konosidas komo ambisyon, kuryozidad, imajinasyon, enerjiya i persistensya kombinadas kon la intelijensya, enaltesyeron un shifro inkreivle de Djudios a un rango byen elevado en diversos domenos. La proporsyon de Djudios kon un IQ de 140 o mas, es estimada ser kaji 6 vezes superyora a los otros grupos etnikos.
Los Djudios oy, pueden konstituir solamente el % 020 de la populasyon total del mundo. (sinko vezes manko ke % 1 !!..) Malgrado esto, eyos ganaron el % 29 de los premios NOBEL en literatura, medikeriya, fizika i kemika en la sigunda mitad  del 20.Siglo. Vinyendo al 21. Siglo, de ağora la figura es de %32 ... Estos Djudios fueron kaji ekskluzivamente ombres, desendyentes de Evropeos del Oeste. Esta konstatasyon, malgrado tanta diskriminasyon, nombrozos impedimyentos legal, persekusyones i el Holokosto...
Del 1870 al 1950, los Djudios fueron lider en literatura, muzika, arte visual, biolojiya, kemika, fizika, matematikas i filozofiya. Proporsyonalmente, igual a un nivel muy elevado, konsiderando la populasyon Djudia en la Evropa i Amerika del Norte. En 1954, se konstato 28 kriaturas de una eskola publika de New- York, tenyendo un IQ de 170 o mas. 24 eran Djudios. La proporsyon de Djudios en medikeriya, djustisya, finansa, literatura, sensya, artes kreativos, media, es evidente i enkantadora. Devemos konvenir, el fakto de la superyoridad entelektual  Djudia  nunka se izo sujeto de diskusyon en publikasyones djudias, o ralamente.
Portanto  Charles Murray del American Enterprise Institute, eskrivyo en una seryoza revista djudia, un  “essai” bastante konvensyente, sitando faktos ke nombrimos. Los Djudios no son dezeozos de afisharsen. Fue primera vez ke en una revista se diskutyo esta tema kaji “tabu”. Murray pretende, tala “alta intelijensya djudia” tyene un fondamyento “genetiko”. Espesyalmente Ashkenazim de la Evropa Sentral i del Oeste, durante siglos tuvyeron ijos de alta intelijensya.
El Talmud (Pesahim 49a) dize: “Un ombre deve vender lo ke poseda para kazarse kon la ija de un savyo. İ, de mizmo, para pueder kazar su ija kon un savyo”. En la Komunidad Djudia de la Era Mediana, los ombres intelijentes azyendosen Rabbis, teniyan un estatuto superyor. Pudiyan kazarsen kon ijas de merkaderes rikos dezeozos de tomar yernos de grande saveduriya. Syertos istoryanos apuntaron el “eskurantismo” relativo de la Espanya despues de la Ekspulsyon de los Djudios. Murray en su artikolo dize, los Djudios okuparon pozisyones distingidas en diversos paises ande se instalaron, espesyalmente en la Olanda. A traverso siglos, los “ombres” Djudios  sintyeron el “ovligo” de estudyar la “LEY”, prosesus,  nunka  kompletado. Deviyan meldar a boz alta,  delantre el publiko, kon el eskopo de konfirmar sus lealdad, i ensenyar sus ijos. Murray aki aze una espekulasyon: “Nombrozos Djudios de “modesta” intelijensya, inkapaches de asumir las egzijensyas relijyozas, se alesharon de eyas...” Tambyen, aze aluzyon a la kayida de Yerushalayim,  peryoda de kaptividad debasho el “yugo” de los Babilonyanos en el anyo 586 A.C. (Ʀ)  Malgrado tantas evidensyas prezentadas, Murray no satisfecho, dubyozo, tyene  preguntas sovre la kapachidad entelektual d’el puevlo Djudio, desde su presipyo...  ”Desde Moshe Rabenu, deke un trivo partikolar, bivyendo en el mizmo entorno kon otros trivos del Oryente Medyo, tuvo una intelijensya tan elevada ke los otros no posedaron??” Finalmente dize: “La repuesta  puede ser la ipoteza irrefutavle mensyonada por los Djudios, en el mas “ansyano i famozo” lavoro literaryo: “Los Djudios son el puevlo eskojido par D.”

(1*)- Opinyon personal del autor.
(2*)- En la Sainte Bible p.308(24/14). “El (Nebucadnetsar) yevo en kaptividad todo Yerushalayim, todos los kapos i todos los ombres valyantes, al shifro de dyez mil egzilados, kon todos los fyerreros i artisanos. No kedo ke el puevlo prove de la tyerra...”.