Chika konversasyon kon El Dr. Lydia Albukrek dezinyada Cavaliere dell`ordino della Stella della

Kreo ke (en desparte de su valor syentifika en medikeria infantil) ningun kalifikativo puedia mijor deskrivir Lydia Albukrek.Eya es syempre animada de un impulso irrepresivle de korrer para akudir, afalagar i konsolar.
Eya no aspera ke le demanden ayudo, eya va verso los ke tyenen menester de ayudo.
De un karakter syempre kalmo i optimisto, tornada verso el arte, la riza i el gozo, eya desde su chikes tuvo la impulsyon de luchar kontra la sufriensa. A la edad de 5 anyos (me konto una de sus serkanas) eya se revoltava kuando enkontrava en la kaye ninyos enfermos demandando sedaka, ijikas molestadas o ijikos mal vestidos medyos desnudos tremblando en el frio.
Muncho mas tadre, kuando fue para eya el momento de desidirse por la profesyon a eskojer, Lydia tuvo por un momento la tentasyon de ir verso un otro ramo de la saviduria: “archeolojia”, “antropolojia” o “sosyolojia”, ma la ijika de 5 anyos ke se revoltava kontra la sufriensa de los otros ninyos, estava ainda prezente en eya i ansi opto por la medikeria infantil.
Noche de Alhad, antes de enkontrar Lydia, apareji un chiko kestyonaryo al kual kon simplisidad eya respondyo:

Es ke topas oportuno de avizar prealablemente tus chikos pasyentes en kavzo de kudyos espesifikos ke puedran ser dolorozos?
Por seguro si, ma kon palavras adekuadas i en eksplikando syempre kon dulsor la razon prinsipal, asta pueder konveserlos.

Deve ser muy difisil de diagnostikar el mal de un bebiko ke no tyene ainda la posibilidad de darse a entender, ke azes en este kavzo?
En desparte de todas las konosensyas syentifikas i teknikas ke mos dan los livros i ke por seguro mos ayudan muncho... ay tambyen la intuisyon i sovre todo un syerto koryente de komunikasyon ke se instala entre el pasyente i el mediko i ke se yama senso kliniko.
I kuando te topas delantre kavzos por los kualos no se puede mas nada azer?
Tu pregunta es muy doloroza i me es muy difisil de responder... la sola koza ke se reelmente, es ke nunka vo pueder akostumbrarme a ver sufrir un ninyo sin nada azer para akudirlo...en todo kavzo,en semejantes sirkunstansyas, despues de aver aprovado todas las teknikas adekuadas, kale antes de todo kalmar el padre i la madre, eyos solos tyenen el poder de ayudar.

El faktor psikolojiko es muy
importante, no?
Primordyal... por egzemplo kuando ay un problema entre el padre i la madre, un ninyo mizmo aedado de unos kuantos mezes lo syente immedyatamente, i munchas vezes lo manifesta kon un dezrepozo fiziko...

Tyenes proyektos muevos por el avenir?
Aktualmente esto formando (en dos institutos estranjeros de los kualos so el mediko) grupos de eskolaryos entre 13 / 15 anyos , edad muy kritika para los adolesentes en sus personalidad fizika komo psishika ...les demandamos de avlar de sus problemas i ansi tenemos kon eyos kolokyos muy interesantes.
Estamos tambyen azyendo la mizma koza en institutos de la periferia ande los elevos son de kondisyon ekonomika mas modesta... los problemas son kaji los mezmos.

...(fin de la entrevista)
Ay ainda munchas kozas a kontar al sujeto de Lydia Albukrek. ma malorozamento el espasyo me manka en esta pajina...la konosko de serka i muestra ultima konversasyon me impresyono mucho.
Es tanto raro de ver “la intuisyon indo endjuntos kon la refleksyon” , “la maturidad de razonamyento kon ainda en un kantoniko del korason un poko de esta inegalavle esperansa de la chikes” ... Lydia Albukrek tyene esto, eya es esto.