Las madres de munchos Sultanes eran de orijin etranjero; gregas, bulgaras, rusas, fransezas (naturalmente kristianas o judias). Kuando uno de los ijos de estas mujeres se aziya Sultan, eya se aziya “Valide Sultan” (Madre del Sultan). Duspues ke estas ijikas (ke eran lo mas esklavas), entravan al palasio del Sultan, les trokavan los nombres. Sinko de estas madres eran judias.
Yo vos va eskrivir sovre Hurrem Sultan porke eya era una de las mas famozas i puederozas mujeres del Imperio Otomano.
Hurrem Sultan (1506- 1558), yamada Roksalane en la Evropa, era la mujer de Kanuni Sultan Suleyman (Suleyman el Manyifiko ) i la madre de Sultan Selim II (Selim el blondo).
Hurrem Sultan (Alexandra Lisowska) era una esklava ke fue fuyida de Ukranya en una ekspedision del Sultan. Aleksandra era de una famiya judia de Polonya. Duspues ke entro al palasio, eya empresiono el Sultan kon su ermozura, intelijensia i kapachedad. A la fin, Hurrem reusho a kazarse kon el Sultan kon un kazamiento legal. Este kazamiento fue el primer kazamiento legal en el Imperio Otomano. (La sinyifikasion de Hurrem es “alegre”).
Hurrem Sultan tuvo una grande influensia sovre los echos interiores del palasio; eya dirijo las mujeres en el Harem. Eya tuvo tambien una grande influensia en la politika interior i eksterior del Imperio Otomano. Aparte de sus okupasiones politikas, Hurrem partisipo a la fondasion de munchos edifisios publikos empesando de Mekke fin Yerushalaim. Estos fondasiones fueron ospitales por mujeres esklavas, eskolas, fuentes, un hamam (banyo) en Estambol (Haseki Hurrem Sultan Hamami) i mishkitas.
Hurrem inspiro munchos artistos i fue el tema (konu) de munchas ovras artistikas en la Evropa. Un ermozo porter de Hurrem Sultan se topa en la Galeria Uffici, en Firenze, Italia. Otras ovras muzikales fueron kompozadas por eya; una sinfonia de Haydn, una opera de Sichynsky, un ballet, romanes i ovras de teatro.
Hurrem Sultan era tanto kapache ke eya reusho a pasarlo a su ijo Selim II al trono i lo kazo kon una ijika judiya (Rashel) ke tomo el nombre Nurbanu (“reyna ke reflekta la luz del Dio”).
Rashel fue fuyida i vendida a un merkader de esklavos en Pera a la edad de diez anyos. Un enkargado del Sultan la merko i la yevo al palasio para servir en el Harem.
Esta ijika flaka i sin fuersa , reusho a empresionar la Valide Sultan (Hurrem Sultan). Hurrem Sultan la embiyo a Manisa para ke resiva una edukasion buena. Anyos duspues, en una vijita a Manisa, Hurrem Sultan la rankontro aya i desido ke eya va ser la mujer de su ijo, Selim II. El Sultan SelimII la vido a Nurbanu la primera ves el dia de la boda, ma el se namoro de eya i eskrivyo por eya las mas ermozas poemas de la Literature Otomana.
Hurrem Sultan muryo a la edad de 52 anyos i fue enterrada en una tomba ke yeva su nombre en la mishkita de Suleymaniye en Estanbol.
La primera de las otras tres madres judias de los Sultanes eran Ayshe Hafza Sultan (Rashel), la mujer de Yavuz Sultan Selim i la madre de Kanuni Sultan Suleyman. La sigunda era Hatice Muazzez Sultan (Eva de orijin Polako), la mujer de Sultan Ibrahim i la madre del Sultan Mehmet IV. La tresera era Bezmialem Sultan (“fiesta al mundo).
Bezmialem Sultan era la mujer del Sultan Mahmud II, i la madre de Sultan Abdulmecit.
Estas sinko mujeres puederozas reusheron a empresionar los Sultanes; eyas fueron mujeres de valor ke fueron respektadas en el palasio i enfluensaron los echos interiores i eksteriores del palasio i del Imperio.
