‘Edukar no es solo reformar los estudiantes, ni divertirlos, ni azerlos ekspertos de la teknolojiya. Edukar es ekspandir sus horizones (ufuklarini genisletmek), mobilizar sus intelekto (zihnini harekete gecirmek), i ansenyarlos a pensar rekto (dogru dusunmeyi ogretmek).
Esta definision de ‘edukar’, por siguro no es miya. Kada diya, los edukatores estan bushkando muevas teknikas para pueder arivar a este objektivo de la mijor manera.
En la Turkiya, kon la propozision de Ataturk, el ventikuatro de November fue fiksado komo ‘Diya de Profesoras’. Ma, en kada pais este diya es selebrado en un data diferente.
El dover de una profesora es de fasilitar sus elevos a ke se ambezen presto i ayudarlos a developar sus talentos i sus kapasidad de pensar.
Esta es la mas semple definision del dover de una profesora. Ma, si analizamos de mas profondo, vemos ke karar de emportante es, el rolo ke una profesora djuga en la vida de sus elevos. Los profesores son los mas emportantes modeles en la vida de sus elevos. Una profesora pena ke sus elevos se apersivan de sus talentos i ansi, ke puedan formar sus vidas en ganando konfidensia.
Ayudar sus elevos a determinar objektos en la vida, ambezarlos a gerreyar kon difikultades, azerlos ganar buenas kalidades, oriantarlos en el progreso akademiko, sosyal i santimantal; en rezume, ayudarlos a avrir las puertas de una vida buena, es el mas grande dover de una profesora. En la vida de oy, mezmo las profesoras kale ke lavoren para developar sus talentos, para pueder alkansar a los trokamientos de la teknolojia. Oy, la teknolojia esta adelantando tanto presto ke kada persona tiene menester de ambezarse kozas muevas i ser eleva la vida entera. Kada dia se esta aviendo kursos muevos mezmo para los adultos. Ansi, el kargo de las profesoras esta ogmantando de diya en diya. Las profesoras tambien, estan partisipando en kursos para ambezarsen las novedades de la teknolojia i las muevas metodes de edukasion. Komo estomos viendo, tan emportante i difisil es el kargo de una profesora. Ma malorozamente, en el mundo entero, las profesoras dainda no puedieron alkansar los derechos ke meresen. Las profesoras del mundo entero, antes de todo, estan demandando buenas kondisiones de lavoro, i buenas pagas para pueder bivir konfortable.
Para pueder sostener el kargo de estas responsabilitades, las profesoras, en el mundo entero, tienen menester del suporte i la proteksion de los governos. Esperamos ke esta profesion, ke es tanto respektada, va reushir a ganar sus derechos i ansi, en el futuro, va tener mas muncho prestij en el mundo entero.
