Kale akseptar ke no se asperava nada de definitivo ni de entuzyasmante, ma solo un reempesamyento de las vyejas negosyasyones... syempre los mizmos problemas, las mizmas revendikasyones, las mizmas keshas, komo un sirkulo visyozo ke da la impresyon de no pueder nunka parvenir a avrirse...
Dos shefes de governo eyos mizmos konfrontados a immensas difikultades en sus propyos payizes, ovligados de luchar kontra personas refraktaryas a kualkyer akordo de paz, komo enfokadas en una vizyon personal de la situasyon.
I, sovre todo, en los dos kampos, un dubyo persistente, un sospecho resiproko, komo un vyejo fondo de odyo ke metra muncho tyempo a pueder rezolverse.
Munchos puntos litijyozos devran ser arreglados. De una parte: El estatuto definitivo de Yerushalayim,sivdad sakra para la totalidad del puevlo Israelyano i tambyen muy importante para el mundo Muzulmano... la sesasyon de todo modo de mueva kolonizasyon i mizmo el abandono de vyejas implantasyones okupadas por moradores viseralmente atados a eyas.
De otra vanda: la fin absoluta de todo modo de terrorizmo i mizmo de simple agresivita, de la parte de una manseves asedada de sangre i ke tyene komo uniko objetivo de erradikar (yok etmek) el Estado de Israel.
Un punto muy pozitivo: “Reprezentantes de payizes Arabos ke poko tyempo antes no rekonesian la egzistensa de Israel, estavan prezentes. Esta prezensya parese ser muy sinyifikativa. Es ke un punyado de ombres de buena voluntad, konsyentes de sus derechos komo tambyen de los derechos del kampo adverso, puedran ayudar a rezolver el problema? Todos konosemos la importansa de una minoridad aktiva i fuertemente konvensida de la verasidad de sus argumentos, la kuala tyene munchas vezes la posibilidad de venser la mayoria i de azer trokar las kozas..
Sean kualas sean las difikultades, esta konferensya es un muevo paso. No mos olvidaremos ke “el tyempo” ke tyene munchas vezes un poder de errozyon konsideravle sovre la amistad i el amor, puede tambyen tener un efekto kalmante sovre el odyo i el aborresimyento...
