Novedades...Novedades...

El sukseso del kinzen Maraton organizado por el sentro “Naime i Selim Salti”
Entre multiples otras novedades ke mos vyenen de la Tyerra Santa , mos ambezamos kel kinzen Maraton  organizado en el “Sentro Naime i Selim Salti” de la Universidad Bar Ilan , obtuvo un  sukseso muy grande.
El tema era: “Las komunidades Djudias Bulgaras de antes”
Entre los ke tomaron la palavra se topava la Prof. Dora Mancheva de Sofya i  “Selim Salti” fundador del dicho Instituto, ke respondyo al Jornalisto Benny Ziffer konsernando el artikolo  ke el publiko en la gazeta Haaretz, en desfavor del “Judeo Espanyol”.
La sala de konferensya estava yena i  aunke nunerozos oditores akseptaron de kedar en pyez, munchos otros no pudyeron mizmo entrar.
El famozo “Koro de los bulgares de Israel” kanto en Ebreo, Ladino i Bulgaro
Felisitamos los partisipantes i auguramos a este eksepsyonal lavoro “reushita  buena” i ke syempre ayegen a sus objetivos.

“La lettre sepharade” de muevo sovre la shena Sefardi
Grasyas a la  presyoza kolavorasyon de Linda Toros , ija de una padre orijinaryo de Estambol , “La lettre Sepharade” de lakuala su fundador Jean Carasso  mos avia anunsyado la klotura ,  retorno de muevo a la vida aktiva.
Su reaparisyon sovre la shena de la kultura Sefardi es, para mozotros todos sus lektores, un momento de profunda emosyon i de grande kontentes.
Desde su kreasyon ,anyos antes, “La lettre Sepharade” fue syempre un sentro de enkontro para numerozos sefardim esparzidos en el mundo,  i un punto de referensya para munchos otros ke se topavan en la perpleksidad.
En el muevo numero ke venimos de resivir, dos “artikolos de fondo”: El uno del fundador Jean Carasso el otro de  Linda Toros ke akepto de asumir la ermoza responsabilidad de su kontinuasyon .
La jonksyon entre “el potensyal de refleksyon ke da la eksperyensa” i “el inegalavle  dinamizmo ansi ke la voluntad de ir adelantre de la manseves” daran, sin nigun dubyo. rezultados muy pozitivos i muy performantes.

Apresyasyon del lavoro artistiko de Esti Saul en dos gazetas de muestra sivdad
A la sigida de la manifestasyon artistika  “Art İstanbul Sanat Günleri” ke tuvo lugar entre el 9 i el 18 del mez pasado ,  a la kuala partisipo muestra amiga Esti Saul , el Jornalisto Hıncal Uluç eskrivyo un artikolo ,en la gazeta Sabah del 17 Novembre , en el kual syertas de las ovras ekspozadas fueron sitadas kon envezes sus opinyones personales.
Su  apresyasyon konsernando muestra amiga fue la sigyente: “Esti Saul..İlk defa görüyorum, ama son defa olmayacak..Harika.”
De otra parte en el Milliyet del 10 Novembre 2007, debasho el titulo: “İstanbul’un dev sanat platformu”, entre 4  ovras de las kualas mos dan la vizyon,  figura tambyen una ovra de E. Saul,   kon esta chika notisya: “Artistanbul’daki sergiler arasında Haluk Özden’in (solda) ve Esti Saul’un (üstte) eserlerini bulmak mümkün olacak.
Ke syempre  tengamos a anunsyar buenas novedades ansi  ke kozas pozitivas.