No vo avlar ni de mi enorme regreto de esta separasyon , ni de las kualidades intelektuales de muestro amigo,de su dinamizmo o del dezeo imperyozo de realizasyon ke ay en el; todos los ke tuvyeron la okazyon de enkontrarlo ya lo saven.
Kero solo avlar de la inmensa influensa ke el tuvo en muestra komunidad, malorozamente dividida en su djuzgamyento sovre muestra lingua etnika . Pablo elimino munchos prejuisyos i sovre todo rendyo al Judeo- Espanyol su dinyidad de lingua en la kuala se puede pensar, avlar, eskrivir komo lo izyeron muestros avuelos.
El no aksepto nunka de tratar la avla Sefardi komo lingua bastadra o estropeada, ma komo una variante del Kastilyano medyeval ke evoluo de una manera otonoma segun lo ke enkontro sovre su kamino.
El no fue solo un delegado aktivo i intelijente, ni se limito unikamente a kumplir su misyon en la dimensyon la mas ancha, el supo ir adelante de la djente de Estambol.
Kon simplisidad ansi ke realizmo, i tambyen una enorme voluntad de aserkamyento, Pablo Martinez Asuero supo trokar la mirada de munchos de muestros korelijyonaryos ke desdenyavan sus lingua etnika.
Uvo komo un enkontro entre muestra komunidad i el, un enkontro kulturalmente i tambyen afektivamente muy riko ...ay momentos ande me ago una pregunta a lakuala me es difisil de responder : “Es ke son los eventos ke azen la persona? o la persona ke, sin tener konsensya de la koza, krea los eventos?”
Puede ser ke, envezes, diferentes kozas se realizan porke tala persona se topa a un syerto momemto ,en tal lugar...
Ay muncho de avlar sovre Pablo Martinez Asuero , sovre su amabilidad , su sensivilidad, su menester kaji imperativo de komunikar i sovre todo de dar , su potensyal de entuzyasmo i tambyen su inmensa kuryozidad intelektual i kultural ...nada lo desha indiferente.
Si, ay muncho de dezir , muncho de konter, ma el espasyo ke es atribuido en esta oja a kada redaktor es de 500 palavras maksimum; por respekto enverso mis kolegas dezeo someterme estriktamente a esta desizyon impozada por la sola nesesidad de una kolaborasyon bazada sovre la amistad i la igualidad.
