Duspues de su muerte, Hakko fue komemorado kon tres seremonias.Duspues de la seremonia relejioza en la Sinagoga Neve Shalom, Hakko fue enterrado en el primer simeterio judio en Ulus.
Vitali Hakko kreo la primera marka Turka, “Vakko”, rekonosida en el mundo entero komo un sembol de kalidad i de buen dizayn. El fue un pionero en el komersio de ropa de la Turkiya. Hakko teniya 94 anyos kuando muryo. Nasido en Estanbol en el anyo 1913, Hakko se engrandesio en la epoka trista de la Primera Gerra Mondial. Estos anyos eran tambien los anyos de la Gerra de la Liberasion en la Turkiya.i de la elevasion del Fondador de la Republika Turka, Mustafa Kemal Ataturk. Hakko empeso el komerso kon un empesijo modesto ma lavoro tanto mucho ke reusho a establisir un emperio en el komersio de ropa. Hakko avyo su primer magazen “Sen Sapka” en el anyo 1934 ande el vendiya chapeyos. En estos anyos, aviya salido “La Ley de Chapeyos” i los ombres eran ovligados a vistir chapeyos del stilo oksidantal.
Hakko no se kontento solo kon un magazen de chapeyos. El keriya pasar a otros echos. Duspues ke vendyo chapeyos por un sierto tiempo, Hakko se desido de pasar al mundo de la “moda”. Ma por pueder reushir, kaliya tener moneda. Oy, dainda ay djente ke se akodran komo Hakko vendiya fulares i gravatas en un koshe (araba) de mano. Vitali Hakko reusho a ganar tanto bueno en este echo ke, mas duspues avyo un magazen muevo en Istiklal Caddesi, (la mas emportante kaleja de Beyoglu), en el anyo1962. En este magazen, Hakko empeso a vender aksesuares de ombres i de mujeres. Akeyos diyas, aksesuares aviyan empesado a ser moda.
Kuando Hakko avyo su magazen de departamentos (department store) ke era el solo “department store” de Estanbol akeyos diyas, Istiklal Caddesi era la mas selebre kaleja de moda en la sivdad. La djente elit de la sivdad uzavan a kaminar a lo largo de esta kaleja, ande rankontravan sus amigos. Esta djente elit teniyan el uzo de entrar a Vakko, ande puediyan topar prodaktos de buena kalidad. La kalidad de las materiales utilizada fueron una grande atraksion por la djente rika i los vistidos dezinyados por Vitali Hakko fueron una novedad por la Turkiya. Akeyos diyas, Vakko era el solo magazen ke vendiya vistidos prontos i el solo magazen ke akseptava kredit kartas etranjeras komo American Express. Akel tiempo las mujeres uzavan a merkar ropas i kuzir fostanes en kaza. Por esta razon, el magazen “Vakko” ke era el bebe de Hakko, se izo muy selebre en Estanbol; tan selebre ke Hakko no se lo imajinava en su vida.
En los anyos 1980, la Turkiya empeso a enrikeserse. La televizyon estava amostrando muevas posibilidades. Los rikos empesaron a viyajar mas muncho al etranjero i empesaron a tener mas munchas ekspektasiones.
Vitali Hakko era mas kapache de sus kompetitores. La vitrina de Vakko fue la primera a meter mankenes feminenas i maskulenes kon vistidos elegantes; lo mas, mankenes de ombres de negosio kon vistidos elegantes i una gazeta etranjera debasho del kovdo. Akeyos diyas, la etiketa “Vakko” sinyifikava ke esta persona es rika i tiene muncho gusto. Los “Espesial” klientes de Vakko teniyan kartas de reduksion.
Mezmo ke Hakko era judyo, no se travo de propozar a la munisipalita de azer reduksiones en los diyas de Noel i del anyo muevo. En poko tiempo, todos los magazenes de Beyoglu empesaron a adaptar este uzo. Hakko reusho a konvenser la munisipalita a illuminar la kaleja entera, en estos diyas espesiales.
Ma malorozamente, Istiklal Caddesi ke era la kaleja prinsipala de los elites de Estambol, empeso a ir abasho. Personas ke estavan emigrando a Estanbol de los vilajios de Anatolia, empesaron a akumularsen en Beyoglu. Un grupo de ombres de negosio, (kon Hakko siendo sus lider), penaron a rekuperar la kaleja Istiklal Caddesi i el distrikto Beyoglu. Porke la kaleja tenga de muevo la splendor ke teniya anyos antes, la munisipalita la serro al trafiko, solo el tramvay puediya pasar de la kaleja.Los edifisios viejos a la larga de la kaleja fueron restorados i las galerias de djugo fueron serradas. Ma los eforses de Hakko no fueron sufizante. La kliantela de Vakko a ir a morar en los distriktos mas leshos. El anyo ke pasimos, el magazen Vakko de Beyoglu se serro por entero. La famiya Hakko avyeron un magazen muevo en Kanyon, (uno de los mas muevos sentros komersiales de Estambol).
Los diyas ke pasimos, malorozamente la Turkiya peryo el fondador de la primera marka Turka selebre en el mundo. La Turkiya peryo una leyanda kon el nomre Vitali Hakko ma la marka “Vakko” va kontinuar a bivir en el mundo entero.
