Şeli GAONEntre semana ke era fyesta, ke todos estavan en kaza repozandosen, una demanyana el telefon sono; i uno de muestros amigos mos bushko en dizyendo ke se eskarinyaron muncho de mozotros i ke mos vayamos kon eyos a kaminar, para pasar un diya entero endjuntos. İ mozotros mos aparejimos ; alhad demanyana mos topimos kon dos kuples keridos, entimos, afavles (cana yakın), sinseros i lo mas emportante korektos.
Veramente; ay mas de dos mezes ke no mos puidimos ver, i ya mos aviyamos eskarinyado de eyos. La persona; no es konkriada (yaratılmış) para bivir solo.
La natura propozo la unyon; por esta razon, kale avenirse (uyuşmak) kon las personas; i developar esta unyon ,devinir amigos i aliados (dost). La amistad (dostluk) tura kon el adjuntamyento (birliktelik), se envedrese kon la kerensya (sevgi), i da fruta kon el esforso.
Si ay kerensya i aserkamyento entre las personas; eyos se akordan (anlaşmak) i la amistad nase. La amistad se realiza entre las personas buenas i vertuozas (erdemli). La amistad aze ganar a la persona la vertud. En la amistad nada no es kon hadras (yapmacık). Todo es verdad, i vyene de aryento del korason.
La moralitad (ahlak) de la amistad deve de ser limpya, entre eyos deve de aver un akordo (anlaşma) en todo modo de sujetos, en la fason de pensar, en sus dezeos, sin apartamyento (ayırımsız), un akordo perfekto.
Enfin; a midi mos fuimos a un kazal serka de Silivri; un lugar ke veramente paresiya a un kanton en el paradiso. Una villa entre las vedruras, el tyempo klaro, puro i limpyo golyendo la tyerra, el sol briyando enriva de una chika pisina.
Emprimero kaminimos el lugar, yeno de arvoles de fruta, kon unas kuantas kazikas chikas en el entorno, un motel chiko konstruisado enriva de un tapet vedre.
Mizmo ke el tyempo estva muy yelado, el sol mos estava kayentando.
Los tyempos yelados kon luvya, i ariskuros dan un pesimismo a las personas. Kuando es klaro; la persona syente un optimismo i todo modo de koza se va derecho.
Yo penso ke; la natura kalma i da el repozo a la persona. La natura es la vida, es la vejetasyon (bitki örtüsü), es rozas, es el aver. La persona no puede bivir sin respirar.
Di ke paresiya a una kaza de montanya. En el entorno de la pisina aviya tres bankos de tavla. Mos asentimos enfrente del sol kayente i bevimos un flamur savrozo arekojido en akel momento del arvole; golyendo al miskle. Despues de una ora; pasimos al salon de komer, aryento organizado komo una kaza. La kamareta de asentar kon fotolyos repozados, i la televizyon, los livros kon los CD estavan en medyo. Allado un mupak briyando de limpyeza, en el salon unas kuantas mezas para komer.
Los patrones; marido i mujer muy sivilizados, la mujer okupandose del komer i el marido arisivyendo los klientes kon muncha fineza i dando detalyos a las demandas.
Mos asentimos a komer i bever vino, en esta atmosfera repozada i empesimos a avlar, kontar i pasar el tyempo kon muncho plazer.
Una de las amigas, es muy dulse, topa lo positivo en todo modo de akontesimyento en la vida. Su marido; muy savido en todo modo de espasyo; kon los byervos de kerensya mos ayuda a entender las verdades simples de la vida de kadal diya en azyendomos riyir.
La otra amiga da repozo i kalmo djusto komo la kolor de la mar i del syelo i tyene una avla kayente.
Su marido; intelijente es kayadiko ma muy savido; i mos ayuda a deskuvrir (keşfetmek) la konosensya de todas las eksperiyensas ke pasamos en la vida. Estar kon muestros aliados endjuntos; aze naser un arko de syelo de kerensya.
En esta atmosfera; mos sirvyeron un pranso ekselente, muy savrozo, todo muy fresko i byen presentado. El kafe lo bevimos en la kamareta de asentar; diskutyendo enriva de la politika i otros sujetos enteresantes; komo ekspozisyones, teatros, filmos i arte. Fue un diya muy reushido i yeno de kerensya i nostaljiya.
Syempre teneremos amigos i aliados en muestro entorno para pueder bivir kon felisidad.
