Dora NİYEGOVitali Hakko empeso a lavorar a la edad de katorze anyos, komo aprendiz en Mahmutpasha, el vijo sentro de merkanseria en Estanbol. El, dediko su vida a la etiketa de la marka “Vakko” ke es una marka de kalidad en la moda Turka.
Kada presipyo o fin de anyo tuve el uzo de eskrivir un artikolo alegre, o una fanteziya, lo ke penso azer oganyo tambyen... Un moabet sovre la “freneziya” de emplear, komo dizimos aki, “alışveriş” o si preferash “shopping!”...
Coya DELEVİ
No ay dubyo ke es una nesesidad tenyendo grande prioridad en la egzistensya del benadam. Es lo ke azemos todos para kompletar muestros menesteres komo komer, vestir, ets.. i los menesteres de muestros nidos. Ay vezes, mos aze plazer de merkarmos una bavajada ke mos gusta, o regalos para los keridos. Mos permetemos “kaprichos”, mizmo si no se trata de un objekto indispensavle. Es normal, en la natura de las kozas... Yo los konsidero afilu komo aksesoryos menesterozos ke azen la vida mas ermoza...
Salir a emplear... Nosyon simpatika al oyido, ma ke guadra munchas kozas en sus detalyos... Emplear es tambyen en raporto kon la umor de akel diya!!.. “Alışveriş” es el byervo egzakto para sinyifikar esta nosyon, i me eskuzash si lo uzo en vezes al lugar de “empleos”... Bazandome sovre mis observasyones, arrivi a la konkluzyon personal ke ay unos kuantos tipos de “damas”. Siguro, puedo i yerrarme en kategorizandolas...
Las primeras son “Alışverişkolik” verdaderas!. Para eyas no ay konsepsyon de lugar, ni de ora de emplear. Si una koza les plazyo, el presyo tambyen no les importa muncho! Ay vezes ke se toman una vestimyenta sin afilu aprovarla!. Keridos lektores no esto egzajerando. Ay talas personas, i no solo en vestimyentas, tambyen si se trata d’algun objekto de kaza, djoyadura ets... En jeneral pagan kon karta de kredito. (devo dezir kartas!!!)
Ay otras ke saven la valor de la moneda, en este senso: asperan las vendidas a rebasho (indirim) i tambyen bushkan kualidad. Posedan una syerta doza de “snobizmo”. Porke estas damas visten solo prodoktos de marka, “signé”... Preferan merkar kualidad en fin de sezon, a presyo konvenivle, en vezes la mitad del presyo normal. (ke portanto i esto puede ser alto) En jeneral emplean de los magazenes ke la konosen byen...
Ay otros tipos ke asperan los soldos tambyen, ke son enterasadas en buena kualidad, ma no en marka. Eyas dizen: ”Es rekomendavle de merkarvos a presyo barato, prodoktos ke no tenesh en vuestro vizavi. Si topatesh una koza ke vos va ir, tomaldo, mizmo si no lo nesesitash akel momento. Keda para la otra sezon!”... Ay naturalmente las ke emplean kuando tyenen reelmente menester. Ay las ke preferan merkar lo mas muncho posivle kon lo menos de moneda!. Ken no lo kere?!! Ma, atansyon! Esto es tomar el risko de kayer en prodoktos de basha kualidad. A vozotros de djuzgar...
La freneziya de emplear kualo es? Los psikologos dizen ke es un ”Akto Kompulsivo” ke pusha a merkar, i esta pasyon se ve mas muncho en las mujeres. A kondisyon de no ser egzajerada no es muy terrivle, i se ve kaji en el 80% de personas normal. Los sinyores en mayoriya, son auzados a merkar el prodokto ke les plaze o les konvyene, del primer magazen ke entran. Eskojen un pedaso o dos, del reyon, se los provan. Ma, si el esta akompanyado de su partenera, es un poko mas komplikado!. Eya le aze provar un kostum, i otruno, asta ke esto se transforme en tortura para el ombre!..
Finalmente unos, dos propozitos del Dr. Psikologo Ümit Boz: “En syertos kavzos el ”Alışveriş”se aze para salvar de depresyon. Si se depasan las frontieras, lo ke adjusta un suplemento de gaste, aumenta el estado de depresyon. Aki se ve la influensa negativa de esta pasyon sovre la persona...”
Kualo puedo adjustar? “Pasyon” o “Hobi”?... En todo kavzo “Fobi” para el ombre!.. Mis suetos de paz i repozo para el mundo, en 2008...
