Klara PERAHYA
En este segundo dia del anyo 2008, son multiples los dezeos ke kero formular.
Por seguro antes de todo salud buena a todos, refua i melezina a los hazinos i salvasyon a los ke se topan en el apreto.
Kada anyo, a semejante data, kada persona, ken kon konviksyon, ken kon septisizmo, formula suetos, kaji syempre los mizmos; ma ay tambyen munchos otros ke nunka kitamos de la boka, puede ser porke sentimos ke son irrealizavles.
Es eyos ke kero formular oy, al reziko de provokar la ironia, i todo en savyendo ke es en vano. No azerlo es enterarlos por syempre... formularlos es darles forma ... darles kaji puerpo.
Para ke una koza tenga la posibilidad de realizarse, kale kreer en eya malgrado el dubyo, i antes de todo no kale kayarmos malgrado la burla de los ke mos entornan
Dunke lo ke oy, dezeo:
“Entendimyento i kerensya entre las personas.
“Akseptasyon resiproka las unas de las otras, malgrado todo lo ke envezes las desferenya.
“Komprender ke kada uno tyene menester de konsiderasyon i de kudyo
“Sinseridad en los korasones.
“Juisyo en muestras refleksyones.
“Klaredad en muestro pensamyento.
“Koraje de trespasar muestras obsesyones i muestros prejuisyos.
“Saver ver mas leshos ke muestro solo orizente.
“No enkorvarmos delantre la fuersa ni el poder, ma solo delantre la razon.
“No eskojer la fasilidad unikamente porke es fasil, ma solo en kavzos ande es el mijor kamino a segir.
“Ser objetivo i imparsyal en muestro juzgamyento.
“Tener konfiensa sin kaer en la syegedad.
“Saver mirar lo ke se pasa en muestro entorno sin por esto ser indiskreto.
“No ser indiferente a nada ni enverso ninguno.
“Entender ke kada koza ke mos ambezamos, mos enrekese de una mueva konosensya.
“I enfin, guadrar muestra esperansa sin iluzyonarmos.
Ay unos kuantos mezes de esto,meldi en un livro fransez una muy ermoza refleksyon: “Ce qu? distingue l’homme de la bete ce n’est pas l’intelligence, c’est la faculté d’espérer. (lo ke desferensya el ombre de la haya no es la intelijensya ma la fakultad de esperar).
Ya lo se, estamos bivyendo en una epoka kaotika , echa de instabilidad i obskurantizmo, ande no ay lugar para la esperansa ... Es justamente por esto ke no devemos abokar la kavesa ...”Esperar” es un empesijo de revolta kontra lo ke parese se munchas vezes una fatalidad invensivle, “Esperar” es un empesijo de lucha.
