El Jornalisto Sami Kohen onorado por dos postos odyo- vizuales TurkosVyernes la noche en el posto odyo- vizual CNN, “Sami Kohen” gazetero Turko byen konosido en muestro payis komo tambyen en la prensa oksidental, fue intervyuvado, de una manera muy apresyativa por el grande periodisto Taha Akyol,a la okazyon de la publikasyon de un primer volum de syertos de sus artikolos editados desde 54 anyos en el kotidyano “Milliyet”, i ke fueron en el livro analizados i komentados a la luz de la konjonktura prezente, enjunto kon el jornalisto Özer Yelçe.
Es inkontestavle ke un rekolyo de artikolos eskritos al dia dia, por un gazetero de su dimensyon, kon un esprito analitiko de una objektividad absoluta, konstitue un verdadero dokumento istoriko.
Esto mos fue konfirmado el dia sigyente en la entrevista sovre la kestyon de “Shipre”, kel jornalisto Haluk Şahin tuvo en el kanal 8 de la Televizyon Turka, kon Necati Zincirkiran ansi ke kon Sami Kohen, los kualos fueron los primeros testigos del problema shiprioto, el uno al nombre del kotidyano Hürriyet, el otro del Milliyet.
Ansi, 50 anyos despues, fue retrasada en todos sus detalyos, la epoka ande el prinsipyo de “self determination” empeso a manifestarse en la famoza İsla, lo ke fue i es ainda un objeto de litijyo entre la Turkia i la Gresya...
Alhad pasado, el mizmo Haluk Şahin publiko en el jornal “Radikal” un artikolo muy elojyozo, ande el mos avla de la valor profesyonal de muestro amigo i mos dize ke fue personalmente testigo en 1980, a una data ande se topava en Washington, de la kapasidad de Sami Kohen a entrar en kontakto kon fonksyonaryos del “Ministeryo de los Echos Eksteryores”, de la “Kaza Blanka” o del “Klub de la Prensa” afin de pueder kaptar la golor del momente, formular kestyones adekuadas i obtener ansi informasyones presyozas...
Oy en dia, syempre en aktividad, inkansavle en sus investigasyones i en su bushkida de la verdad, Sami Kohen es, sin dubyo, una figura muy estimada de la Prensa Turka i enaltese ansi el prestijyo de muestra komunidad.
