Şeli GAON
El anyo 2008 ke mos trayga a todos
LA ESPERANSA, la alegriya i la felisidad=
Un anyo muevo es un presipyo (başlangıç) ke kontyene todo modo de evenementos, mos da la kuryozidad, la emosyon. Todos mozotros devemos de ser pozitivos i realistos.
Kualo asperamos de la anyada 2008?
Lo mas emportante estabilidad ( istikrar) en todo modo de punta de vista en el pais. Mizmo ke es difisil; kale konservar la esperansa.
Personalmente penso ke; las personas deven de konservar sus esperansas; para pueder kontinuar a bivir, para pueder luchar kon las problemas.
Mizmo si estamos muy pesimistos, para pueder depasar este estado; kale ke konservemos muestra aftaha (ümit).
Tenemos en el doredor; konosidos, amigos, keridos hazinos, personas ke estan luchando para un bokado de komer, para bivir, personas de muestro entorno, de muestras famiyas, mansevos ke se estan muryendo. Esto todo mos esta trayendo el pesimismo, i estamos peryendo el guste, la gana de bivir.
Ma, no kale decharmos i demoralizarmos; kale estar muy fuerte para pueder rezistir a las difikultades. Porke la vida es una lucha (mücadele) permanente (sürekli), sin tomar reflo.
Delantre de unos kavzos puedemos kedar irremediavle (çaresiz) i mos puedemos demandar u mos puedemos revoltar en dizyendo;” deke las personas buenas se estan iyindo, i los negros estan kedando?....”
La persona es apta a ansyearse (kaygılanmak) por kualker koza. Mos estamos ansyeando; por el avenir de muestra famiya, ijos, ijas, padres, madres, el entorno, por muestros keridos, amigos, alliados...
En el dor ke estamos bivyendo; la vida esta muy difisil para todos en el mundo entero. El dor troko, la teknolojia muy avansada mato la valor de muestros kostumbres.
En este estado ke mos topamos puedemos pensar ke la anyada 2008 va kontinuar kon todos los puntos negativos (olumsuz) i nada no va trokar.
İluzyonarse (hayal kurmak) i pensar ke esta iluzyon va ser verdad, tener esta esperansa, lavorar i luchar es la mijor koza, para pueder liberarse de este pesimismo.
No kale pedrer la esperansa mizmo en los momentos los mas difisiles i ariskuros. Porke esperar; es kreyer ke va naser un muevo diya ermozo despues de todas las amarguras, de todas las penas. No se puede bivir sin esperar i sin iluzyonarse.
Kero partajar un kuento (öykü) ke me plaze muncho i ke no me esto akodrando a ken apartyene.
Es El Kuento de las Kandelas
Quatro Kandelas estavan kemandosen a poko a poko. Se puediya uyir lo ke estavan avlando entre eyas; tanto el derredor estava kayado.
La primera kandela disho :
“Yo so, LA PAS, (Barış) ma dingunos no me esta ayudando para kemarme. Me esta paresyendo ke en serka me va amatar,” i su flama se aminguo i se amato.
La sigunda kandela;
“Yo so LA FİDELİDAD (Vefa), ma malorosamente la djente se estan esvacheando de mi. Por esto; no ay menester ke mi flama kontinua a kemar”.
Kuando termino de avlar; el ayre la amato.
La tresera kandela; kon una boz triste disho;
“Yo so LA KERENSYA (Sevgi). No tengo mas la fuersa de kemarme. Las personas se olvidaron de mi, no estan entendyendo mas mi valor. Se olvidaron mizmo de kerer byen a los mas serkanos.
İ eya, se amato. En supito; un ijiko entro a la kamareta i vido ke las tres kandelas estan amatadas.
“Deke no estaj kemando? İ empeso a yorar.
En esto la kuatrena kandela empeso a avlar.
“No te espantes chikitiko; mi flama esta kemando i puedemos asender las otras kandelas kon esta flama.
“Yo so LA ESPERANSA (Umut).
El ijiko gustozo tomo la kandela de la Esperansa, i empeso a asender una por una las otras tres kandelas.
Ke nunka la Luz de la Esperansa no manke de muestra Vida !....
Todos mozotros puederemos azer bivir kon la Esperansa; la Fidelidad, la Pas i la Kerensya.
Keridos Lektores; vos oguro la anyada 2008; ke seya para todos, yena de sanedad, de felisidad i de esperansa...
