Novedades... Novedades...

Difisil de responder... imposivle de afirmar ke un kualkyer problema fue rezolvido, salvo un muevo esforso echo en esta direksyon, un esforso de salir del imobilizmo, lo ke no es poko...

Aunke sedyento(susamiş) de repozo i de Paz, el puevlo Israelyano kedo septiko... el de Gaza syempre medyo ambyerto, yeno de odyo i ira, agresivo i irrekonsilyavle...

Revendikasyones difisil a kontentar, malgrado el imenso dezeo de los aktuales dirijentes Israelyanos de azer todo lo ke es posivle para ayudar la kreasyon de un Governo Palestinyano.

Una de entre eyas imposivle a realizar: el retorno de los 7 milyones de desendyentes de los  palestinyanos ke avian fuyido en 1948 del territoryo akordado a Israel por La Asamblea de las Nasyones Unidas... Esto sera un verdadero suisidyo.

En el korso de su vijita Georges Bush tuvo el kudyo de repetir munchas vezes el termo “Governo Israelyano Judyo”... lo ke (segun un gazetero fransez) fue kontestado por el prezidente Mahmud Abbas.

I tambyen un fakto muevo: El Prezidente de los Estados Unidos rekonosyo frankamente ke munchos Judyos pudiyan salvar de la muerte durante el Olokosto, si la Armada Aeriana Amerikana akseptava de bombardear los kaminos ferrovyeros polonezos sovre los kualos vagones yevavan kontinualmente deportados Judyos a los kampos de la muerte.

Si, komo fue dicho mas arriva, ningun problema fue rezolvido, ma un muevo esforso fue echo afin de salir del immobilizmo.