El Ministerio de Emigrantes tiene la entision de serrar la majorita de los Ulpanes.
El biervo ‘ulpan’, ke sinyifika ‘estudio’ en ebreo, es una de las piedras de las mas emportantes por la entegrasion de los emigrantes judios al puevlo del pais. El kurso Ulpan kontinua sinko mezes, kon un programa intensivo fokusando a la lektura, eskrituria i a la konversasion en ebreo.
Ma, en los anyos dalkavo, los Ulpanes no estan mas siendo sufizante al trokamiento de vida.
El objekto de la desizion de serrar los Ulpanes, es por ayudar a los emigrantes, ke se ambezen el ebreo de una mijor manera, en las eskolas privadas.
Los edukatores estan dizyendo ke, la metoda de ensensia de los Ulpanes, no esta mas siendo sufizante para enseniar el ebreo, de un buen nivel (seviye).
En los anyos dalkavo, el pais empeso a akseptar 20 000 emigrantes al anyo. Los 8 000 de estos emigrantes son adultos ke se estan ambezando el ebreo en los Ulpanes. Kada adulto (siendo mas grande de 18 anyos) puede eskojer el Ulpan ke kere, i azer un kurso de sinko mezes (500 oras de klasa).
Las investigasiones suivadas por el Ministerio de Emigrantes, estan amostrando ke los emigrantes ke eskaparon el Ulpan, estan avlando la lingua de un nivel basho o mediokre (orta). Solo los trenta por sien de los graduados (mezun), estan puediendo meldar i eskrivir de un nivel sufizante, i munchos de los elevos estan deshando el estudio en medio.
El Ministerio organizo una asamblea, para egzaminar este sujeto. ‘Muestro objekto es de azer una reforma serioza, i topar mijores metodas para enseniar la lingua de mijor fason’ esta dizyendo Jocob Edery, el Ministerio de Emigrantes.
El Ministerio tiene la entision de avrir fondasiones privadas por los emigrantes. El governo les va dar bonos (senet) a los emigrantes, para ke pagen a las eskolas.
La metoda de ensensia no es el solo problema de los Ulpanes. Los Ulpanes no estan mas puediendo prosedar (uymak) al estilo de vida de los muevos emigrantes. Munchos de los emigrantes no estan mas puediendo asistir a las lisyones de demanyana, porke munchos de eyos estan lavorando afuera. De agora en delantre, kale meter klasas de denoche para ke los emigrantes puedan lavorar entre el diya.
Una otra koza ke el Ministerio de Emigrantes esta konsiderando, es de meter klasas obligatorias para los emigrantes.
Dagora en delantre, los emigrantes se vana ambezar solo la lingua bazika (ana lisan). Los biervos teknolojikos se vana alevantar del programa de estudio, por los emigrantes kon profesiones, komo doktor i enjenior. El butche esta sufizando solo fin al medio del anyo ke viene.
Un otro projekto del Ministerio es de establisir sentros de estudio por las kreaturas de los emigrantes. En estos sentros, las kreaturas se vana ambezar la lingua por unos kuantes mezes, kuando las eskolas se avren,i antes de ampesar las lisiones de klasa.
Segun Halfon, el direktor jeneral, los ijikos de los emigrantes, se estan asentando en la klasa, sin entender las lisiones, i no estan puediendo azersen amigos kon dingunos, porke no konosen la lingua. Va ser mijor por eyos, de pedrer las lisiones en el empesijo del anyo, i tornar a la klasa kuando se ambezan la lingua, para pueder suivar las lisiones.
Ma, el Ministerio de Edukasion no esta dakordo en esta idea. Kuando se pedre el empesijo de las lisiones, es muy difisil de ratraparsen.
Dainda no se topo una solusion final a este problema. Esperamos ke se va topar la mijor solusion, i ke los emigrantes vana pueder avlar el ebreo de la mijor fason en poko tiempo.
