En la peraşa de la semana, "Beşalah" se avre la pajina primera, del Puevlo de Yisrael, komo una Nasyon libera, en la istorya umana.
Por Primera vez sale el puevlo de esklavaje a la libertad, se delivra de sus cadenas de fierro, en verso del dizyerto temerozo, ma libero!
Munças difikultades, tuvo para salir a la enkontra, de la grande luz, ke lez aklaro akea noçe propya de la salidura de Egypto. "Lel şimurim u Lado" "Noçe de guadriya de D..."
Esto, era el primer paso de la libertad. Ma la libertad verdadera, dainda no se alkanso. Dalivrar de las kadenas del esklavaje, no es solo fizikas. El kamino a la libertad Reel i Efektiva, era leşos proseso de la delivrensa entrerior, i espritual, ez maz diffisil i los syenes de anyos de esklavaje, penetraron profondamente, a la nasyon en jeneral i individual.
El çiko mundo spritual, de la persona, no asemeja al mundo korporel fiziko. Efasa del esprito, sintimyentos de esklavaje, no se obtyenen immedyatamente en una noçe, abandonando la vida del esklavaje. El mundo psikolojiko no asemeja al mundo fiziko i korporel.
Persona ke estava longo tyempo, en el mundo areskuro no puede imedyatamente, suportar una luz grande, no asemeja a lavar las manos, sino ke kon el tyempo se auza a las kondisyones nuevas.
Trokamyento de situasyon spritual, no asemeja, a las kondisyones korporales. Kuerpo kansado fizikamente, kon un esfuenyo dulse i repozado, retorna a su mezma kondisyon i enerjiya. Ma esprito dolensyozo, dura munço tyempo a adoptarse a las nuevas kondisyones.
Korason dolorozo, su reaksyon a kada estado, pozitiv o negativ, ez muy emosyonante, el sufre de topar, el ekilibro spritual, i adoptarse a la vida reel.
Le reaksyon, del puevlo ke salyo a la libertad, en doz evenementos siguidos, en kurto tyempo, nos da a entender mas klaro la situasyon, spiritual ke el se topava en akeas epokas.
El verseto ke trata, la oras de la libertad (14- 31) la emosyon del puevlo era formidable el eksprima sus sintimyentos "Vayar Yisrael et Ayad ahazaka etc... i "İ vido İsrael los miraklos de D..." i tuvyeron grande Fey en D... i en Moşe su syervo."
Akel mizmo puevlo, yeno de Fey en D. i en Moşe, kurto tyempo, dospues en no topando agua; (17- 2) se olvida todo, i se revolta kontra Moşe, a grado de duvdar la egzistensya i surveyensa de D.., aryento del puevlo. "Ayeş Ado.. bakirbenu im Ayin."
Dos estados sprituales kontraryos en mezmo puevlo en kurto tyempo? Es ke no es un espejo ke relata lo sus diço? Dos eskolas formaron, el esprito de la Nasyon Cudiya (1) El esklavaje en Egypto (2). La vida de 40 anyos en el dizyerto. La epoka del dizyerto fue la eskola de adaptasyon i formasyon spirutual leşos del esklavaje no solo del kuerpo seno ke i de la alma.
De otra parte, el esklavaje en Egypto fue la eskola de edukasyon, a la nasyon Cudia, akodrarse de su pasado, a no ser kruel, de apiyador al prove.
Los byervos repetados en munças okazyones "Vezaharta ki eved ayita" No te olvides i akodrate ke tu fuites esklavo i ya saves la alma del abatido ez el mesaje i la leson la maz elevado ke se degaja a la Nasyon Cudia. Ez en el resultado de estos evenementos ke formaron el karakter, i el mundo spritual de la nasyon Cudia, a ser por egzempyo a la umanidad kon su fey Monoteista i los prensipyos de la moral Divina.
