‘’Los judios, los kristianos, los musulmanes gerreyaron por miles de anyos, para konvenser su enimigo para ke troke su relijion. Nunka, las personas no puedieron bivir endjuntos en sostenyendo la unitad, la pas i la entegrasion. Kon estas gerras, kon tiempo, la djente se aminguo porke no kijeron akseptar la multikultura. Ma el eskarinyo de un mundo, ande las personas de las tres relijiones, (biviendo endjuntos, avlando diferentes linguas i teniendo diferentes kulturas), nunka no aminguo’’.
La pyesa muzikal ‘Ashura’, ke se esta djugando en Estambol en estos diyas, esta empesando kon estos biervos.
‘Ashura’ esta kontando la istoria de -los otros- los ke fueron ovligados a deshar sus patrias en la istoria entera, por modo de razones politikas o relijiozas.
Ashura es un alimento ke se puede rankontrar en munchas kulturas. En esta pyesa, ashura se esta empleyando komo un sembol de la sosiedad multikultural, siendo ke los diferentes ingredientes empleyados en azyendo ashura, no piedren sus savores, mezmo ke duspues ke buyen en la mezma kaldera.
El tema prinsipal de la pyesa es la emigrasion forsada por las minoridades en muestro payis (empesando
del
anyo 1928), por krear una lingua i una kultura homojena en el payis.
Los mueve artistos mos estan kantando lamantasiones en diferentes linguas; en ebreo, en arminesko, en grego, en judeo-espanyol, en kurdesko, en la lingua de los lazes etc. Estas linguas estan sembolizando las minoridades forsadas a deshar sus patria. Los artistos estan empleyando la muzika, la luz i el muvimiento para darmos el sentimiento de tristeza de estas minoridades arondjadas de sus pais.
Esta pyesa se djugo en ocho paizes en el etranjero (komo Suisa, los Paizes Bashos, Danimarka i Italia). Los espektatores etranjeros tomaron grande plazer de esta pyesa porke la idea detras
del
show es universal. En kada pais egziste –el otro-; kada pais se okupa de la distinguision de las diferentes kulturas. La pyesa se metio a la sena en el diez del mez Enero (Muharrem). Muharrem es el primer mez
del
kalendario Islamiko. En el diez de este mez, el mundo se kreo; Adam en Eva fueron arondjados
del
paradiso. En este diya Avraham, Moshe i Jesus nasieron. Moshe emigro a Ejipto, Jokob se topo kon su ijo Jose en este dia. En el mezmo diya, la barka de Noah fue aronjada en tierra de montanya. En este diya, el inyeto de Mohammed, Huseyin fue matado en Kerbela i por esta razon, los Shiis (un kulto de los Musulmanes) konsideran este diya komo un diya de lutyo.
Komo estomos viendo en esta pyesa, la tendensia de la ‘tolerensia’ empeso a entrar en aktividades artistikas en muestro payis. A la fin de la pyesa, los artistos mos ofrieron ‘Ashura’, komo un sueto. Este sueto siendo, un diya de pueder bivir en pas todos endjuntos i de pueder krear un mundo entegrado de multikulturas.
