Ke sean orijinaryos del Este o Oeste de la Evropa, o byen de kualkyer otra rejyon delmundo, la Amerikareprezenta para los Judyos un djenero de Eldorado ande korye la leche i la myel.
En su Ultimo livro sovre los Judyos Amerikanos, el byen konosido istoryano Fransez Andre Kaspi (grande espesyalisto, komo lo dishe en mi artikolo de la semana pasada, de la politika i vida amerikana en jeneral, i partikularmente de las kondisyones de vida de muestros korrelijyonaryos en los Estados Unidos) akordo una entrevista a Victor Malka kolaborador de la revista “Information Juive” i avlo de la estruktura komunitarya del Judaizmo Amerikano.
Entre munchas otras kozas muy interesantes ke malorozamente no tengo aki, en esta pajina, la posibilidad de transmetervos, Andre Kaspi mos dize ke los Judyos Amerikanos susitaron syempre grandes fantazmas i prejuisyos. Numerozas personas les atribuen una influensa eksesiva sovre los grandes delpayis, lo ke envezes provoka un sentimyento de antisemitizmo.El mos ambeza ke avia Judyos en la Amerikadel Norte desde la mitad del 17en siglo, ma es entre los anyos 1880 i 1920 ke empesaron a immigrar en grande kuantidad, por empesar Judyos de la Evropasentral i despues Judyos de Rusia.
La integrasyon fue difisil, kalia lavorar duro. La famiya entera i tambyen los ninyos pasavan oras enteras en atelyes malsanos. Eyos lucharon kontra la mizerya kon la esperansa no de azersen rikos, ma de ayegar a un syerto grado de komodidad.
Munchas vezes, olas de antisemitizmo se manifestavan. Las otras minoridades ke avian i eyas emigrado i ke eran eyas mizmas viktimas de la mizma diskriminasyon, se vengavan sin razon sovre los Judyos.
La segunda gerra mundyal troko la situasyon. Los Judyos en edad de ser mobilizados, kombatyeron lado kon lado kon los otros sitizanos, la entrada en las universidades i en varios empyegos fue fasilitada i poko a poko el antisemitizmo pyedro de su vigor. Los Judyos devinyeron sitizanos Amerikanos komo los otros, kon una diferensya ke devemos tomar en konsiderasyon: “sus reushita materyal fue espektakular”.
Segun una vyeja leyenda los judyos Amerikanos son todos rikos, lo ke no korresponde a la realidad. En 1972 los Amerikanos deskuvyeron enfin ke ay Judyos proves, muy proves, ke biven en la oskuridad i no tyenen ninguna influensa politika. Segun una enkuesta echa a este propozito, en la sola sivdad de Newyork ay 250.000 proves judyos a los kualos kale adjuntar 500.000 esparzidos en las otras partes de los Estados, por la mas parte, personas aedadas abandonadas o ke no tyenen ninguna famiya, judyos ke avian emigrado en 1941 sin kalifikasyon profesyonal i ke ne se pudyeron adaptar a la kompetisyon ekonomika.
7 % de los Judyos Amerikanos biven debasho el umbral de la provedad i se puede dezir ke en syertos lugares el indisyo de mizerya de muestros korelijyonaryos es mas fuerte kel de los otros Amerikanos
Esto no empide ke (komo lo dize el grande istoryano) los Estados Unidos fueron i son ainda la otra “Tyerra Prometida”.
Komo lo afirma tambyen André Kaspi, “ser Amerikano es para un Judyo una serteza de prosperidad, de seguridad i de egualidad, ningun otro payis no puede ofreser las mizmas garansias”.
Portanto una inkyetud: “la asimilasyon”.A este propozito, Andre Kaspi sita lo ke Alan Dershowit , profesor a Harvard, avia dicho en el anyo 1997. “...la amenaza la mas grave no vyene de los ke keren persekutirmos, ma de los ke, sin niguna maldad, pueden matarmos kon sus amabilidad , en asimilandomos, en kazandosen kon mozotros, en adjuntandosen a mozotros kon respekto, admiraston i mizmo kon amor”.Lo “esensyal” se topa en la ensenyansa, la ensenyansa del pasado i sus reperkusyones sovre el “prezente” i el “avenir”, una ensenyansa ke deve renforsar muestro sentimyento identitaryo en akodrandomos las grands valores del Judaizmo
