Dizen “ Muncha miel bulaneya!”... Es por modo d’esto ke no kero enfasyar el lektor kon otrun artikolo sovre el “Amor”. Kon mis poezias, ya inchi una oja en “El Amaneser”, i me parese ke seriya bastante, ke dizish?.. Ma, no en una oja, el “Amor” no kavyo ni a tantos livros, tantos filmos ke se izo... Tantas poezias, romansas ke se kompozo... Al pareser ke esto todo fue en baldes!.. porke es una nosyon ke no se puede definir, no konose leyes, ni reglas. Asigun los romantikos, esto aze el “Amor” atraente (cazip) i majiko!.
Eyos pueden kontinuar a eskrivir, no tengo objeksyon (itiraz). Unos dizen: “El Amor es la ermozura ke mos dyo la vida...” myentres ke otros afirman: “El Amor es la sorpreza ke mos apareja la vida...” Si una kantika dize: “El Amor... akel momento es Amor!..”, nunka puedes entender kuando es el famozo “Momento”... Muy probavle ke troka de persona a persona!...
El lektor tyene aki, el derecho de demandarme: “Si es en baldes, deke tomates la pena de azer un artikolo kon este titolo? ” Muncha razon, ni yo se egzaktamente porke... Puede ser porke muestra jenerasyon mos kreimos al “Amor”, afilu si no puedemos definirlo... Otruna razon de eskrivir oy sovre este sujeto, deve ser la majiya del 14 Febrero, de la St. Valentine... Se transformo kaji en uzo tradisyonal de azer un teksto semejante a esta okazyon. Una tradisyon, ma no un ovligo!.. En todo kavzo no vo dar una definisyon personal del “Amor”, ke asigun syertos es “El mas ermozo regalo ke mos izo la vida”!...
No es kompletamente mi opinyon, syendo ke este regalo no es valivle (geçerli) para los solteros, o los ke no tuvyeron shans en amor. Yo no kero komentar ma, el poeta i eskrivano Fransez Louis Aragon (1897-1982) disho: “No ay amor feliche. Si kada amor era orozo, deke se eskrivyo tantos romansos de amor ke los mansevos meldaron kon lagrimas en los ojos?”... Mizmo si no esto enteramente d’akordo kon el poeta, devo darle razon, en una manera. En muestra manseves, no mos artavamos de sintir de Yves Montand, la famoza kantika “Les Feuilles Mortes”.
“... Ma la vida separa”
“Todos los amados,”
“En kalmo, sin bruidos,”
“İ la arena efasa los pasos,”
”De los amantes dezunidos...”
Era i lo mizmo por los filmos ke preferavamos, kaji todos romantikos. Kuantos de mi jenerasyon se akodraran del famozo filmo “You ara always in my heart”? (Syempre estas en mi korason) Kon muestro İnglez insufizyente de akeyos anyos, kantavamos kon byervos yerrados, la kantika... Akeya epoka, en los biletos de sinema no markavan las oras de seans, ni el No. de fotolyos. (koltuk) Konosi personas, salyendo del sinema, los ojos korolados de yorar, despues de ver 2-3 seanses konsekutivas este filmo. Aki vo adjustar, yo tengo el disko de Dean Martin, i oy en diya lo syento kon plazer i un poko de nostaljiya...
Keridos lektores, devo terminar aki, ma komo en la kantika, estash syempre en mi tino i korason, en tal ke amigos...
