No se komo nominar el ultimo livro de Izidor Barouh, publikado en la kaza de edisyon Gözlem,. Antes de tomarlo en mano, tenia la impresyon ke se tratava de una otobiografia, ma en realidad no es el kavzo, El otor avlo muy poko de si mizmo,..Su diskresyon i su modestia no son un sekreto par ninguno.
Este livre es antes de todo una pedaso de istorya; parsyalmente la istorya del adelantamyento de muestro payis, la istorya de la kreasyon de un muevo sistema de komunikasyon komersyal en un vyejo imperyo en dekadensya atado a sus tradisyones kon la iluzyon de ser syempre invensivle..
La aksyon empesa 6 anyos antes de la data de nasimyento de Izidor Barouh.
En 1909, el İmperyo estava en estado de perdisyon, undido en las devdas i la prekaridad,.. Mas grande es el sujeto ke deskaye, mas irremedyavle parese su kaida,.
A esta data, en Estambol, un mansevo intelijente i odasyozo, de kultura oksidental, David Samanon, ijo de una famiya muy kontada en muestra komunidad, riko de buena voluntad i del dezeo imperativo de reushir, penso realizar un proyeto de difuzyon de publisita, Poko despues se adjuntaron a el dos otros partenaryos Ernest Hofer i Jak Huli, un trio dinamiko yeno de ideas muevas. Ansi nasyo la primera ajensia de reklama, la unika en akel tyempo,
Al empesijo, la tentativa era perikoloza, difisil a realizar; kalia entrar en raporto kon diferentes periodikos del payis, bushkar formulas ineditas, topar tambyen otros medyos para azer konoser ropas muevamente importadas de la Evropa o fabrikadas en el payis,..sus plano de lavoro era bazado sovre el kontakto umano.
Entre tyempo, la plasa komersyal empeso a devenir de mas a mas aktiva, kreando ansi un esprito de konkurensa ke nesesitava metodas ineditas...
Anyos despues en 1932 Izidor Barouh, alora aedado de 17 anyos, izo sus primeros pasos en el buro mizmo de "Hofer,Samanon,Huli"; por empesar komo shefe de la kontabilidad i mas tadre komo direktor jeneral i enfin komo patron... su karakter enerjiko i en mizmo tyempo muy avenivle ansi ke sus aspirasyones personales lo destinavan a okupar el posto el mas alto de esta institusyon..
La evolusyon de la ajansia fue paralela a la evolusyon ekonomika del payis...las tranzaksyones komersyales pujaron kada dia mas, teknolojia Amerikana empeso a inchir la plasa... la konkurensa se intensifiko ainda mas... el lavoro pujo,
Kon el tyempo muevas ajensias de reklama empesaron a apareser, al empesijo ainda flakas mal introduzidas serka de los diferentes periodikos de muestra sivdad, a las kualas el "İlancılık Şirketi" akordo su ayudo en este kampo.
En su livro Izidor Barouh avla de la gerra 1939/45, de sus konsekuensas i enfin del arreglamyento de las kozas kuando poko a poko todo empeso a entrar en orden,.. El toko tambyen a diferentes otros sujetos...la importansa de la publisita sovre los ekranes de sinema,,, su haveransa kon Elie Acimam,,,, i mizno el konflikto ke el tuvo kon Cıhad Baban en el anyo 1952 ets...ets..
El estilo del livro es koryente i muy bivo, kon ekspresyones de la epoka, echo prioritaryamente de kestyones i repuestas...
Malorozamente Izıdor Barouh no mos avlo de su vida sosyal i filantropika ke fue grande al seno de la komunidad Judia; por kontra la lettre ke el eskrivyo a su ijo Yakup Barouh es, komo lo disho tan justamente Tilda Levi, un verdadero mensaje de etika adresado a la manseves de muestra epoka.
