En el korso de la Sigunda Gerra Mundial, nombrozos grupos de Djudios, espesyalmente de la Evropa del Este, bushkaron kaminos de fuyir del ginnam ke los asperava. Por lo mas sus destinasyon era la Palestina. Turkiya fue un itineraryo (güzergah) preferado, una puerta d’esperansa para los emigrantes fuyendo kon naves. Una puerta avyendose de la Mar Marmara, a la Mediterrenea... “Struma”, kon su rekuerdo trajiko ke evoka, fue el mas konosido de estos naves de esperansa (ke kontradiksyon!). Fue tambyen el ke konservo su misteryo durante munchos anyos. Uvo diversas espekulasyones i teoriyas sovre la eksplozyon ke kavzo su undisyon en el 24 Febrero 1942.
Era una epoka de estrechuras, de reselos. 1942 fue el anyo ke marko mi chikez, i me desho munchos rekuerdos. Yo teniya apenas 8 anyos, ma todos los evenimyentos kedaron gravados en mi memorya, i entre otros, el de “Struma”. Lo estuvimos vyendo de muestra ventana de Galata, todo el tyempo ke estuvo ankorado delantre Sarayburnu... Lo ke kere dezir kaji dos mezes i medyo, desde su arrivo el 15 Desembre 1941... Estuve sintyendo del entorno komentaryos por lo mas yerrados. Kon mi natura investigatora, demandi a syedra i derecha, sin rezultado. La sola persona ke me pudriya responder, mi kerido papa (b.m) estava en el servisyo militaryo komo rezervisto, las “20 Klasas”...
Anyos pasando, esta trajediya kedo para mi kon puntos d’interrogasyon, asta antes unos kuantos anyos. El evenimyento kavzando polemikas, se transmetyo de diferentes maneras, i lo mas inegzaktas. Por akodrar, aki, en rezume el kavzo “Struma”: “Era un nave alkilado por los Djudios de Rumaniya, pais ofisyalmente antisemit a la epoka. Durante la Sigunda Gerra Mundial, el nave iva transportar los emigrantes Djudios a Palestina, akel tyempo debasho el kontrol de los İnglezes. Struma fue torpilyado i undido, a la salida del Bosfor, apenas entrando a la Mar Preta... Kavzando ansi, la muerte de 768 almas...”
El viaje de “Struma” fue organizado por la adjensya “Tourisme Mondial”, en realidad oportunistos, dezeozes de kitar profito materyal de la fuyida dezesperada de los Djudios. Syertas organizasyones Sionistas komo “Betar”, i personas pudyendo pagar, aviyan finansado el viaje. Dinguno fue permetido de ver el nave antes de la partensya. İ kuando lo vyeron, ya no aviya mas ke azer... “Struma” era un vyejo, eskaido nave, rekuperado del fondo del Danubyo,( Tuna Nehri) i reparado vezes i vezes... Los malorozos fujitivos lo vyeron dunke en un estado deploravle...
Fue solamente en 1964, un istoryano Aleman, pretendyo ke el responsavle de esta trajediya era un sumaren Sovyetiko, el Shchuka 213. Kon tyempo, esto fue konfirmado por las otoridades Rusas. Akeya epoka de gerra, los Rusos, sospecharon los Alemanes de transferar klandestinamente armas via la Mar Preta, aryento de Rusiya. Por esta razon, los sumarenes aviyan resivido el orden de torpilyar todo modo de nave non identifikada o sospechoza.
El 23 Febrero 1942, sin asperar el rezultado de los tratos entre el governo Turko i el de Churchill, la nave fue embiyada a la Mar Preta, par konsekuensa a su mala suerte...
