En la vida de una persona siempre ay personalidades ke influensan su modo de bivir. Esto puede ser pozitivo komo negativo. Elie Perahya, nasido en 1913 en Haydarpaşa, Estambol, era una personalidad ke influenso a todos kon los ke vino en kontakto pozitivamente. Uno ke konosio a Elie Perahya no puediya no dizirse: “I yo kero ser komo el, un savyo, umanisto, poeta, filozofo, noble i sensilyo.” Para todos mozotros ke lo konosimos, el fue un modelo de la persona ideal ke kada uno de mozotros keria ser. No todos reushimos serlo ma el de su natura lo era.
Para la komunidad djudia de Turkiya Elie Perahya lavoro aktivamente durante 30 anyos, komo miembro del konsilyo administrativo, komo miembro i tambien prezidente de la Bene B’rith, komo konsultante ekonomiko ets ets. Mizmo kuando se retiro del servisyo aktivo, kontinuo a dar konsejos porke suivava todas las aktualidades del mundo i tambien todas las leyes muevas ke salian en el pais de diya en diya. El era komo un grande savyo kon ken se puediya avlar de todo i kon grande amistad, komo amigos intimos, mizmo si aviya muncha diferensia de edad entre el i mozotros.
Elie Perahya era de akeyos ke nunka se enviejesen achakes ke azen lavorar sus meoyo kontinualmente. Komo en kada minuto estava meldando i ambezandose kozas muevas, en kada vez ke enkontrava una fraza ermoza, un paragrafo filozofiko, unas dichas emosionantes, los eskriviya en su tefteriko kon la data i la referensia del livro de ande lo tomo. Estos tefteres yenos de ideas ke el eskojio komo importante mostran el intelektual ke era.
I el Judeo-Espanyol, i el Şalom? Ken mas de el meresyo de meter la laja en judeo-espanyol en Auschwitz kon el Prof. Haim-Vidal Sephiha? En estos dalkavos 20 anyos, kon su kerida mujer Klara, estuvieron luchando por el mantenimiento del judeo-espanyol. Sus diksionaryo “Judeo-Espanyol – Fransez” es respektado por el mundo entero.
I el Şalom? Toda la famiya Şalom siente su peryita del fondo de sus korasones i esto no solo por su kanton de “La Huente”, ke konteniya perlas filozofikas kada semana ma tambien por su prezensia ke mos aziya sintir ke el mundo era un lugar mijor kon el prezente. Mos vas a mankar muncho kerido Elie Perahya, repozate bien en Ganeden...
Karen Gerson ŞARHON
