En la vida kale tres kumbaras. Kualas son estas tres kumbaras me puedesh demandar: una kumbara de famiya, una de amistad i una de estudyo. Estas kumbaras se inchen a poko a poko kon groshes i groshes i es muy difisil para los groshes de avansar en la vida. Estos tres se realizan kon djuzgamiento, kon kara riyente i en vezes kon no durmir, no komer i penar sin pensar a la ganansya.
Estas kumbaras son i un poko kuryozas, echas i echas i te parese ke estas arekojiendo, ma malorozamente sale ke lo ke izites i penates fue en vaziyo, porke kuando tyenes menester i ke estas en apreto, avres i no topas nada...
Para tener las kumbaras yenas, el benadam kale ke sea korekto i onesto. Tambien kale ke tenga kualidades buenas. Kale penar para renkontrar korasones amables.
Yo tuve la shans de aver konosido a un ombre de grande saviduriya i filozofiya, i a todos ke konosio, de kual estado en la vida ke seyan i de kuala edad no importava, mostrava respekto i kerensya. El Sr. Elie Perahya (z”l). El desho tres kumbaras yenas ke no munchos alkansan en sus vidas.
La filozofiya de su vida era de no tomar en konsiderasion lo negativo. Los momentos difisiles ke pasaron en su vida, no los tuvo en sus rekuerdos kontinualmente. Para el, syempre era importante lo de “oy”. Todo la vida meldo, estudyo, produsyo. La kaza todo la vida la teniya yena de livros, i de djente de kada edad ke kerian konversar kon el.
Ay de dizir a los mansevos de oy:
Inchi estas kumbaras kon pasensya.
Estudiya, aze lo ke azesh kon pasyon
Ambezavos la lisyon del pasado i kon esto konstruye vuestro futuro
Ayuda
Azevos buenos amigos
Siempre estesh sonriente.
