Purim en diferentes lugares de muestra Sivdad
Djueve la noche, el 20 Marso, la komunidad Askenaz organizo debasho la direksyon de Rav Mendy Chitrik una fabuloza nochada de purim bazada sovre el konsepto de Anatevka.
La fyesta empeso kon la Megila de Purim, sigida de un superbo konserto de Muzika Klezmer... Kantes komo los tradisyonales “If I Were a Rich Man” i “To Life...to life” galvanizaron la sala.
Tambyen el Kantor Israelyano Simon Cohen ke izo oir temas liturjikos, i arias de operas italyanos, akompanyado del koro Kol Rina, entusyazmo la asistensya
La mizma noche, en el Kal Etz Ahayim de Ortaköy, Purim fue selebrado kon la mizma ardor, en su ritual tradisyonal.
Los varios kostumes de los envitados arrelumbraron ainda mas la atmosfera yena de alegria de la nochada El Prezidente Alber Elvaşvili ekspreso su alegria de selebrar kon los kombidados esta ermoza fyesta i rengrasyo todos los ke partisiparon a su organizasyon, partikularmente Rav Nafi Haleva i la komisyon de damas enkavesada por Berrin Yaeş.
Shabat el 22 Marso, en la Sinagoga Ashkenaz, syempre debasho la direksyon de Rav Mendy Chitrik, Purim fue fyestado kon muncha nostaljia, a la memorya del inolvidable kantor Gerschon Schaposchnik ..
Konferensyas muy sinyifikativas fueron pronunsyadas por Rav Isak Haleva, Rav Mendy Chitrik i Robert Schild.
El kantor Simon Cohen akompanyado del koro Kol Rina, i muestro kapo hazan David Sevi tuvyeron la misyon de azer oyir a la asistensya las orasyones del dia, kada uno sovre el tema de su propya eskola.
La Seuda fue abondante i yena de alegria.
Geçmiş olsun al Dr. Elie Behmoiras
Un grande “geçmiş olsun” al Dr. Elie Behmoiras ke tuvo un chiko aksidente, bendicho el Dyo sin konsekuensa graves.
Vida i salud a todos.
