Alhad pasado, en Atena, en una atmosfera ande se sentia la inkyetud i una syerta ansyedad, la flama Olimpika fue remetida a la delegasyon Kineza.
En las kayes de la sivdad, refraktaryos alevantando el punyo en sinyo de protestasyon gritavan sus dezaprobasyon, fachas amargas ande se meldava la amargura de iluzyones pedridas.
Desde unas kuantas semanas, uno de los temas de refleksyon de los payizes Evropeos fue i es ainda “ el boykot kompleto o parsyal de los Jugos Olimpikos” en sinyo de protestasyon kontra la terrivle represyon del governo Kinezo sovre los relijyozos. Tibeteanos, i esto mos da, ainda mas, la dimensyon de la importansa del drama.
La prensa evropea, kaji en su totalidad, eskrivyo a este sujeto; el Şalom tambyen lo izo desde la semana pasada en primera oja...
Las sugjestyones echas i las solusyones propozadas fueron (komo se entyende byen) diferentes las unas de las otras, si no en el fondo, ma en la manera de tratar el sujeto...
La tendensya mayoritarya no solo al nivel de los intelektuales ma del puevlo el mizmo, es ke sera un formidable jesto de protestasyon kontra los jenosidyos no solo fizikos ma tambyen kulturales si los reprezentates de los payizes partisipantes boykotan las festividades ke presedan las performansas esportivas.
La Kina ke es kaji la mas vyeja sivilizasyon del mundo aktualmente egzistyente, kedo malorozamente muy arkaika en la governansa de su payis. Ekonomikamente florisante a la favor del lavoro inumano i mal retribuido ke los dirijentes impozan a la mayoria de su puevlo, eya kontinua su dominasyon sovre los payizes vizinos konkuistados syeklos antes, i persiste a romper salvajemente sus rezistensya a no renunsyar a sus valores kulturales.
El konsilyo de la Unyon evropea ke se reuniso para diskutir del sujeto, tomo la desizyon de deshar a kada “payis myembro”, la libertad i el yugo de intervenir segun su propya manera de pensar.
Es ke un sinyo kolektivo de reprobasyon vinyendo de una entidad kaji internasyonal, fundada sovre prinsipyos etikos de ermandad i solidaridad, no seria muncho mas persuasivo?...
Por seguro, no se trata de boykotar enteramente los Jugos Olimpikos, esto seria una mankasa enverso el simbolo de kompetitividad i de esforso de perfeksyonamyento ke eyos reprezentan, ma simplemente de demandar a los dirijentes ofisyales de kada payiz-myembro de abstenersen de asistir a la seremonia de avyertura, lo ke seria un terrivle golpe para el orgolyo de la Kina, sin en ninguna manera ofensar la sensibilidad popular..
I syempre vyene al tino este problema moral ke munchas vezes akosa muestro meoyo: Eske tenemos el derecho de deshar perpetrar un krimen sin intervenir fuertemente ni azer todo lo posivle para impedirlo?
Alhad pasado, en Atena, en una atmosfera ande se sentia la inkyetud i una syerta ansyedad, la flama Olimpika fue remetida a la delegasyon Kineza.
En las kayes de la sivdad, refraktaryos alevantando el punyo en sinyo de protestasyon gritavan sus dezaprobasyon, fachas amargas ande se meldava la amargura de iluzyones pedridas.
Desde unas kuantas semanas, uno de los temas de refleksyon de los payizes Evropeos fue i es ainda “ el boykot kompleto o parsyal de los Jugos Olimpikos” en sinyo de protestasyon kontra la terrivle represyon del governo Kinezo sovre los relijyozos. Tibeteanos, i esto mos da, ainda mas, la dimensyon de la importansa del drama.
La prensa evropea, kaji en su totalidad, eskrivyo a este sujeto; el Şalom tambyen lo izo desde la semana pasada en primera oja...
Las sugjestyones echas i las solusyones propozadas fueron (komo se entyende byen) diferentes las unas de las otras, si no en el fondo, ma en la manera de tratar el sujeto...
La tendensya mayoritarya no solo al nivel de los intelektuales ma del puevlo el mizmo, es ke sera un formidable jesto de protestasyon kontra los jenosidyos no solo fizikos ma tambyen kulturales si los reprezentates de los payizes partisipantes boykotan las festividades ke presedan las performansas esportivas.
La Kina ke es kaji la mas vyeja sivilizasyon del mundo aktualmente egzistyente, kedo malorozamente muy arkaika en la governansa de su payis. Ekonomikamente florisante a la favor del lavoro inumano i mal retribuido ke los dirijentes impozan a la mayoria de su puevlo, eya kontinua su dominasyon sovre los payizes vizinos konkuistados syeklos antes, i persiste a romper salvajemente sus rezistensya a no renunsyar a sus valores kulturales.
El konsilyo de la Unyon evropea ke se reuniso para diskutir del sujeto, tomo la desizyon de deshar a kada “payis myembro”, la libertad i el yugo de intervenir segun su propya manera de pensar.
Es ke un sinyo kolektivo de reprobasyon vinyendo de una entidad kaji internasyonal, fundada sovre prinsipyos etikos de ermandad i solidaridad, no seria muncho mas persuasivo?...
Por seguro, no se trata de boykotar enteramente los Jugos Olimpikos, esto seria una mankasa enverso el simbolo de kompetitividad i de esforso de perfeksyonamyento ke eyos reprezentan, ma simplemente de demandar a los dirijentes ofisyales de kada payiz-myembro de abstenersen de asistir a la seremonia de avyertura, lo ke seria un terrivle golpe para el orgolyo de la Kina, sin en ninguna manera ofensar la sensibilidad popular..
I syempre vyene al tino este problema moral ke munchas vezes akosa muestro meoyo: Eske tenemos el derecho de deshar perpetrar un krimen sin intervenir fuertemente ni azer todo lo posivle para impedirlo?
