Serkamente resivi una letra de Povdiv ( Bulgariya) de mi kerida amiga Yvette Anavi sovre el artikolo miyo del “Şalom”6 de Febrero: “SOLEDAD...”. En el sovredicho artikolo yo aviya relatado un teksto de Yvette Anavi aparesido en una revista, antes 10 anyos... Vinyendo a la letra ke tomi... Bastante larga, es mas ke una letra de amistad, ke meldi kon plazer i grande emosyon. Kero transferar un fragmento de la letra, atestando la trajediya ke bivyeron los Djudios de Bulgariya durante la II Gerra Mundial. Yvette no konosyo los Kampos de la Muerte. Malgrado esto eya es una sobrebiviente. Esto lo vash a realizar en meldando estas linyas. Es primera vez ke me esta dando a konoser este evenimyento i yo esto konsiderando estas linyas komo un dokumento istoriko de grande valor...
Me enkantates komo topates estos proverbos sovre “Soledad” ke eskrivi antes tantos i tantos anyos. Te digo ke sos grande endevina (no solo poeta), pormodo ke son proverbos muy aktuales en estos diyas ke esto pasando. Te rengrasyo, i te kero asigurar ke a la edad ke so, tengo menester un poko- muncho de konsolasyon, de amistad i deke no?, de kerensya. Mersi, kerida i estimada amiga de Estambol. Te esto eskrivyendo en el diya muy trajiko por los djidyos de Bulgaria...
Antes sesenta i sinko (65) anyos, la djuderia de Plovdiv ke biviya en el Geto, stuvo ovligada en las oras del amaneser, en unos kuantos minutos, aparejarse para vyaje, kaje dayinda durmyendo, vyejos, kreaturas, prenyadas, madres kon bebes... sin dinguna diferensya, todos stuvimos en el kurtijo de la eskola djudia... prontos para embyarmos, los vagones ya estavan aparejados, verso los kampos ande “En tyerras ajenas yo me vo murir...” Entonses uvo un mirakolo, unos kuantos papazes, deputados, la entelijensa, krisyanos entervinyeron i fin la tadre mos delivraron i tornimos en muestras kazas...
Del 26-01-1941, kon una ley severa kontra los djidyos, stuvimos esklavos. No teniyamos derecho de lavorar, de ambezar, la permisyon de salir de kaza era solo dos oras al diya (de las 8 fin las 10 de la demanyana). Todos eramos ovligados de tener sovre el rever del vestido, el Magen David amariyo. Bivir en kalejas apropyadas para los djidyos- el Geto. Dyez mezes del anyo los ombres eran arikojidos en kampos de lavoro.... Sin paras, sin komanya, ma kon grande volunta i fuersa survivimos para ke oy fyestamos la libertad...
Bivo sola, aparte i la soledad me asiga. Tantos anyos de estos evenementos, eskrivo kon ansya i dolor, a mi amiga leshana, ma muy amistoza. El invyerno lo paso en Sofia, kon mi ijo, ande las kondisyones son meyores. En la primavera, atras a Plovdiv, ande me estan asperando mis “entusyastos” elevos... So miembra de la grande organizasyon djudiya de Plovdiv, kon 450-500 personas, donde solo 50-60 semos los puros djidyos. Ma ken so yo? Yo so Yvette Anavi, la amiga sensera de Coya Delevi. Te abraso de korason.
Yvette P-S-A mi kerida amiga le sueto salud buena, i una fyesta alegre de Pesah.C.D.
