Karen Gerson ŞARHON
La semana pasada, en los dias 27-30 de Marzo 2008, muestros buenos amigos Rosana de la Aza i Sebastian de la Obra, de la Casa de Sefarad en Cordoba organizaron un kolokyo internasional entitulado: “Sefarad: Geografias y Miradas de la Memoria”, debasho el patronaje del Sentro de Investigasiones sovre loa judios de Maroko en Paris i Rabat. Importantes investigadores asistieron al kolokyo kon sus prezentasiones, la famoza sineastra Marroki, Izza Genini, prezento su filmo “Nûba d’or et de Lumière”, un filmo maraviyozo dokumental sovre la muzika arabo-andaluz i su prezervasion en Maghreb.
El Viernes tuvo lugar la primera meza redonda sovre las trasas i realidades en Sefarad. Kada uno de los konferantistos prezento la aktualidad en su pais, inkluyendo Karen Sarhon, direktora del Sentro Sefardi de Estambol, ke avlo sovre la situasion del pasado i prezente en la Turkiya.
La noche de Viernes (noche de Shabat), por la primera vez en munchos siglos uvo un servisio de noche de Shabat en la mueva sinagoga de Cordoba ke se inauguro en la Casa de Sefarad un diya antes. Esto fue un fenomeno muy emosionante. El Sr. Jacky Kadoch, prezidente de la komunidad judia de Marrakesh, izo el servisio i en su avla emosionante mos disho ke “kon este servisio de Shabat las almas (neshamas) ke fueron eskondidas o supresidas durante siglos en Cordoba se van a liberar i van a kantar kon mozotros en una atmosfera de alegriya”.
El konserto de Sandra Bessis, kantante de orijin de Tunisia, ke mos kanto kantes en judeo-espanyol, arabo i ebreo tuvo muncho sukseso. En la meza redonda del diya sigiente avlaron investigadores judios, muzulmanes i kristianos todos kon un buto en sus karyeras: no deshar olvidar la memoria komun ke tenemos todos en esta jeografiya.
