El Salomist de la semana pasada formulo una kestyon a la kuala es difisil de responder: “Kalmak mı zor, dönmek mi?” (İmplisitamente) despues de averse ido estudyar al estranjero, kualo es mas difisil? Kedar o retornar?
En efekto, despues de aver estudyado durante 4, 6 o 8 anyos en un payis ajeno, aver individualmente formado un sirkulo sosyal de muevas relasyones i mizmo amistades i ansi aver konosido una mueva manera de bivir kon sus reglas propyas, es ke es posivle de topar en su sivdad de nasimyento la mizma atmosfera ke la de antes?..
Dos tres kolavoradoras del Şalom izyeron una chika enkuesta sovre el sujeto i intervyuvaron unos kuantos de entre los ke se topan en una semejante situasyon.
En la entrevista ke Karel Valansi tuvo kon la psikologa Esin Acıman, este tema fue abordado en toda su agudeza i su aktualidad.
La psikologa respondyo kon muncho realizmo i lojika. Eya mos dyo los motivos ke pushan los jovenes a ekspatriarsen en el eskopo de asegurarsen un futuro briyante, komo por egzemplo la konosensya de diferentes linguas estranjeras.
Eya tambyen mos avlo de las difikultades ke enkontran nombrozos mansevos en espartyendosen de sus famiya, del eskarinyo ke los persige en tyerras ajenas, de la nostaljia por sus payiz, de todo lo ke aze la dulsor de la chikes...
A la lektura de este ermozo lavoro ke mos ovliga a pensar, una otra kestyon surjise kaji otomatikamente. “Es ke es realmente oportuno de embiar los ijos o ijas estudyar por ahuera immedyatamente despues del liseo?
El fakto de partir a la edad de 18-19 anyos en un payis relativamente deskonosido (sovre todo kuando kale azerlo solo , sin el apoyo afektivo de un kompanyero de chikes) puede ser para un mansevo entre la adolesensya i la maturidad, a penas salido del apreto de la epoka eskolarya, komo una borachez delisyoza ande el se syente por seguro liberado de todo modo de obligasyon enverso una kualkyer otoridad.
Ma “libertad” es tambyen “soledad”, “responsabilidad” , “ezitasyon i munchas vezes anksyedad de dever tomar desizyones sin pueder referar a ninguno." Alora poko a poko se adjunta el eskarinyo de la kaza familyal, del konsejo del padre i sin dubyo del kudyo afektuozo de la madre.
De otra parte, esto no empide ke mezmo si es soledad, la libertad rasyonalmente asumida, es en mizmo tyempo “eksperyensa”... problemas muevos a rezolver... sistemas no solo de estudyo ma tambyen de vida a los kualos adaptarse... ovligo de kontinualmente refleksyonar.
Para los ke kedan,los paryentes serkanos, es una inkyetud latente , un arranko de korason perpetual a dominar, kon en la boka un pasto si no de amargura, ma a lo menos de regreto de una epoka ande se asperava el ruido de la yave en la puerte, o se estremesia al sonido salvaje de una muzika al pareser barbara.
Un grande sosyologo avia dicho ke entre diferentes otras kozas, el 21en syeklo sera el siglo de las famiyas despedasadas , espartidas un poko en kada lugar del mundo..
No se si es enteramente verdad... Devemos achetar ke mizmo si distansyas jeografikas konsideravles separan aktualmente los diferentes myembros de una mizma famiya , afektivamente se produze un djenero de aserkamyento, komo si un esforso de entendimyento i mizmo de respekto mutual se instala malgrado todo entre los ke parten i los ke kedan, .
La sufriensa de la espartisyon aplana munchos litijyos ke en tyempo ordinaryo opozan las jenerasyones las unas a las otras .La absensya idealiza munchas vezes una persona komo tambyen la rende mas komprensible i aksesivle....i para el padre i la madre del ke pudo reushir, este maraviyozo orgolyo de ver ke sus ija o ijo pudo ayegar a un punto al kual eyos mizmos no pudyeron alkansar.
Los Judyos tenemos munchas vezes de afrontar semejantes situasyones , kada una kon su karga afektiva, kada una kon su potensyal de alegria o de tristeza.
